MIOMANA HIHAONA AMIN’ANDRIAMANITRA
TENIN’ANDRIAMANITRA
Eksodosy 19:1-11
Lio 12 :29-34
Asa 2:1-12
Eks 19:1-11
[Ny nitobian'ny Zanak'Isiraely teo an-efitr'i Sinay, sy ny fanekena nataon'Andriamanitra taminy]
(Eksodosy 19:1) « Tamin'ny volana fahatelo taorian'ny nialan'ny Zanak'Isiraely tamin'ny tany Egypta, dia tamin'izany andro izany no nahatongavany tany an-efitr'i Sinay. » (19:2) « Ary rehefa nifindra niala teo Refidima izy ka tonga tany amin'ny efitr'i Sinay, dia nitoby teo amin'ny efitra; dia tandrifin'ny tendrombohitra no nitobian'ny Isiraely teo. » (19:3) « Ary Mosesy niakatra ho ao amin'Andriamanitra, dia niantso azy Jehovah tao an-tendrombohitra ka nanao hoe: Izao no holazainao amin'ny taranak'i Jakoba sy hambaranao amin'ny Zanak'Isiraely: » (19:4) « Hianareo efa nahita izay nataoko tamin'ny Egyptiana sy izay nitondrako anareo tamin'ny elatry ny voromahery ary ny nampankanesako anareo ho aty amiko. » (19:5) « Koa ankehitriny, raha hihaino ny feoko tokoa ianareo ka hitandrina ny fanekeko, dia ho rakitra soa ho Ahy mihoatra noho ny firenena rehetra ianareo; fa Ahy ny tany rehetra. » (19:6) « Dia ho fanjaka-mpisorona sy ho firenena masina ho Ahy ianareo. Ireo teny ireo no holazainao amin'ny Zanak'Isiraely. » (19:7) « Dia nandeha Mosesy ka nampaka ny loholon'ny vahoaka, dia nalahany teo anatrehany ireo teny rehetra ireo, izay nandidian'i Jehovah azy. » (19:8) « Dia namaly indray miredona ny olona rehetra ka nanao hoe: Izay teny rehetra nolazain'i Jehovah dia hataonay. Ary dia nentin'i Mosesy tao amin'i Jehovah kosa ny tenin'ny olona. »
[Ny fiomanan'ny Zanak'Isiraely alohan'ny nanomezan'Andriamanitra azy ny Lalàna] (19:9) « Ary hoy Jehovah tamin'i Mosesy: Indro Aho mankeo aminao ao anatin'ny rahona maizina, mba ho ren'ny olona raha miteny aminao Aho, ka dia hino anao mandrakariva izy. Dia nambaran'i Mosesy tamin'i Jehovah ny tenin'ny olona. » (19:10) « Ary hoy Jehovah tamin'i Mosesy: Mandehana ho eny amin'ny olona, ka manamasina azy anio sy ampitso, ary ampanasao ny fitafiany izy: » (19:11) « ary aoka samy hiomana ho amin'ny andro fahatelo izy; fa amin'ny andro fahatelo no hidinan'i Jehovah ho eo imason'ny olona rehetra eo an-tampon'ny tendrombohitra Sinay. »
Lioka 12 :29-34
[Ny nilazan’i Jesosy ny tsy maha mety ny fiaremana]
(Lioka 12:29) « Koa aza mitady izay hohaninareo na izay hosotroinareo ianareo, ary aza miahanahana*.[*Na: aza aingaingain'ny fanantenana foana] » (12:30) « Fa ny jentilisa amin'izao tontolo izao dia fatra-pitady izany rehetra izany; fa ny Rainareo mahalala fa tokony ho anareo izany zavatra izany. » (12:31) « Kanefa katsaho ny fanjakany*; dia hanampy ho anareo izany zavatra izany.[*Na: (ny fanjakan'Andriamanitra)] » (12:32) « Aza matahotra, ry ondry vitsy, fa efa sitraky ny Rainareo ny hanome anareo ny fanjakana. » (12:33) « Amidio ny fanananareo, ka manaova fiantrana; manaova kitapom-bola tsy mety ho tonta ho anareo, dia harena any an-danitra tsy mety ho lany, izay tsy azon'ny mpangalatra, sady tsy misy kalalao manimba. » (12:34) « Fa izay itoeran'ny harenareo, dia ho any koa ny fonareo. »
Asa 2:1-12
[Ny nilatsahan'ny Fanahy Masina tamin'ny Andro Pentekosta, sy ny tori-teny nataon'i Petera tamin'izany]
(Asan'ny Apostoly 2:1) « Ary nony tonga ny Andro Pentekosta, dia teo amin'ny fitoerana iray izy rehetra. » (2:2) « Ary nisy feo tonga tampoka avy tany an-danitra, toy ny rivotra mahery mifofofofo, ka nanenika ilay trano niangonany. » (2:3) « Ary nisy lela maro mitarehin'afo niseho taminy, izay nizarazara; ary nipetraka tamin'izy rehetra isan-olona izany. » (2:4) « Ary samy feno ny Fanahy Masina izy rehetra, ka dia niteny tamin'ny fiteny maro samy hafa, araka ny nampitenenan'ny Fanahy Masina azy. » (2:5) « Ary nisy Jiosy, mpivavaka tsara, nitoetra tany Jerosalema, avy tany amin'ny firenena samy hafa rehetra ambanin'ny lanitra. » (2:6) « Ary nony re izany feo izany, dia niangona ny olona maro ka very hevitra, fa samy nahare azy ireo niteny tamin'ny fiteniny avy izy rehetra. » (2:7) « Dia talanjona sady gaga izy rehetra ka nanao hoe: Indreo, tsy Galiliana va ireo rehetra miteny ireo? » (2:8) « Koa ahoana no andrenesantsika amin'ny fitenintsika avy izay nahabe antsika » (2:9) « - dia Partiana sy Mediana sy Elamita, ary mponina any Mesopotamia, sy Jodia sy Kapadokia sy Ponto sy Asia » (2:10) « sy Frygia sy Pamfylia, sy Egypta sy ny tany Libya izay manodidina an'i Kyrena, ary vahiny avy any Roma, na Jiosy na proselyta, » (2:11) « Kretana sy Arabo - koa ahoana no andrenesantsika ireo miteny amin'ny fitenintsika avy ny asa lehibe ataon'Andriamanitra? » (2:12) « Dia talanjona izy rehetra ka niahanahana sady niresaka hoe: Ahoana no tokony ho hevitr'izany? »
TORITENY
Dr. Daniel Rakotondravony - Fiangonan'Andriamanitra Miray
- [Ny nitobian'ny Zanak'Isiraely teo an-efitr'i Sinay, sy ny fanekena nataon'Andriamanitra taminy]
- [Ny fiomanan'ny Zanak'Isiraely alohan'ny nanomezan'Andriamanitra azy ny Lalàna]
- [Ny nilazan’i Jesosy ny tsy maha mety ny fiaremana]
- [Ny nilatsahan'ny Fanahy Masina tamin'ny Andro Pentekosta, sy ny tori-teny nataon'i Petera tamin'izany]
Tamin’ny vanim-potoan’ny Pentekosta voalohany, izay nitobian’ny Zanak’Isiraely teo an-efitr’i Sinay sy nanaovan’i Jehovah tamin’izy ireo ny Fanekena voalohany, no nanomezan’Andriamanitra azy ny Didy Folo, izay Lalàna fototra ao amin’ny Fanjakan’Andriamanitra.
Nohamafisin’i Jesosy ny maha-zava-dehibe ny fikatsahan’ny olona ny Fanjakan’Andriamanitra mialoha ny fitadiavany izay hohanina sy hosotroina; amin’izay dia homen’Andriamanitra fitahiana maimaim-poana izy, ny amin’izay hohahiny sy hosotroiny.
Tamin’ny andron’ny Pentekosta no nadrotsahan’Andriamanitra volohany ny Fanahy Masina tamin’ny Fiangonana ara-panahy voalohany, izay misy Josy sy Jentilisa efa nibebaka sy niova fo, ary niangona tao Jerosalema, araka izay nodidian’i Jesosy hataony.
NY PENTEKOSTA : MAMPIANATRA ANTSIKA HANAO INONA?
Fampidirana
Ny fetiben'Andriamanitra dia manoatra ny fomban-drazana "jiosy" fotsiny. Ireo vanim-potoana telo momba ny fety izay resahina ao amin'ny Deoteronomia 16 dia manome topi-maso ny dingana lehibe kasain'Andriamanitra hatao hanangonana na hamonjena ny olombelona.
Nampianatra antsika Atoa Armstrong fa ao anatin'ireo vanim-potoana telo ireo (Mofo Tsy Misy Masirasira, Pentekosta, Fitoerana Amin’ny trano Rantsan-kazo), dia misy fety fito isan-taona:. Ary ireo fety ireo dia manana tanjona roa sosona avokoa.
1) Voalohany, asehon'ireo fety ireo amintsika ny antsipiriany manokana momba ny fikasan'Andriamanitra hirotsaka an-tsehatra amin'ny raharahan'olombelona. Ohatra, amin'ny fararano aty amin’ny ilabolantany antsimo, dia ianarantsika fa ny dingana voalohany amin'ny planin’ny famonjen’Andriamanitra: ny Paska, izay efa vita! Natao sorona indray mandeha i Kristy mba handoa ny sazin'ny otan'ny olombelona rehetra (Hebreo 10:10).
(Hebreo 10:10) « Amin'izany sitrapo izany no nanamasinana antsika tamin'ny nanaterana ny tenan'i Jesosy Kristy indray mandeha. »
2) Faharoa, ny fety dia mampianatra antsika izay tokony hatao, izany hoe: ny anjarantsika amin'ny Planin'Andriamanitra. Tsy maintsy miomana ara-panahy isika amin'ireo hetsika mahafinaritra ireo. Ny Andron'ny Mofo Tsy Misy Lalivay dia mampianatra antsika hanesotra ny ota amin'ny fiainantsika. Nanokana ny Sabata roa voalohany isan-taona Andriamanitra mba hampianarana antsika ity lesona lehibe ity. Tsy ho voavonjy isika raha mamela ny ota hitoetra ao amin'ny fiainantsika. Ny tena kristiana niova fo dia tsy maintsy manaraka fiainana mandresy ny ota (1 Korintiana 5: 6-8).
(1 Korintiana 5:6) « Tsy mety ny fireharehanareo. Tsy fantatrareo va fa ny masirasira kely dia mahazo ny vongana rehetra? » (1 Korintiana 5:7) « Esory ny masirasira ela, mba ho vongana vaovao ianareo, araka izay tsy maha-misy masirasira anareo. Fa voavono Kristy, Paska ho antsika; » (1 Korintiana 5:8) « ka dia aoka isika hanao andro firavoravoana, tsy amin'ny masirasira ela, na amin'ny masirasira lolompo sy faharatsiana, fa amin'ny mofo tsy misy masirasira, dia ny fahadiovam-po sy ny fahamarinana. »
Ny fahatakarana tsara ny fetiben'Andriamanitra isan-taona dia manaporofo fa mbola tsy maintsy hitranga ny ankamaroan'ireo hetsika ao amin'ny planina lehiben'Andriamanitra. Vetivety isika dia hiatrika ny fety amin'ny fiandohan’ny ririnina – ny Pentekosta. Hanao ahoana ny ho avy aseho amin'ity andro masina ity? Ary, inona no takian'ny vanim-potoana fankalazana sy ny andro masina hataontsika, mba hiomanana amin'ity hetsika ity?
Nosoratana Ho Fananarana
Mba hahafantarana izay sary ambaran’ny Pentekosta ho avy, dia mila jerentsika ny tranga sasany izay niseho tamin'ity andro ity.
Misy lesona lehibe hianarana avy amin'ny tantara taloha. Tian'Andriamanitra hahatsiaro ireo zava-nitranga manan-tantara ireo isika mba hanampy antsika hiomana amin'ny hoavintsika lehibe. « Ary izany dia nanjo azy mba ho anatra, sady voasoratra izany ho fananarana antsika izay niharan'ny faran'izao tontolo izao. » (1 Korintiana 10:11).
(1 Korintiana 10:11) « Ary izany dia nanjo azy mba ho anatra, sady voasoratra izany ho fananarana antsika izay niharan'ny faran'izao tontolo izao. »
Nampianarin’i Paoly ny Fiangonana fa ny zava-nitranga taloha dia voarakitra manokana hahasoa antsika irery. Izany hoe: ny olona niova fo ihany no mahazo ny dikan'ny fety isan-taona.
Ny tantaran'ny Baiboly sy ny lovantsofina jiosy dia mampiseho amintsika fa tamin'ny andro Pentekosta no nanomezana ny Didy Folo! Rehefa kajina ny isan’ny andro manomboka ny ampitson’ny faha 15 Niasana nivoahan’ny Zanak’Isiraely avy ao Egypta, hatramin’ny faha 6 Sivana nilazan’Andriamanitra ny Didy Folo teo an-Tendrombohitra Sinay, dia manome 50 marina tsara. Dimy ambin’ny folo andro (15) sisa amin’ny volana Nisana mandra-pahatongan’ny faran’ny volana, izay misy 30 andro. Raha ampiana 29 andro amin’ny volana faharoa Iyar io, sy ny 6 andro amin’ny volana fahatelo, Sivana, dia mitontaly 50 ireo. Izany no fe-potoana nofaritan’i Jehovah hahatongavana amin’ny andro Pentekosta (Levitikosy 23:15-16).
(Levitikosy 23:15) « Ary manisà ho anareo hatramin'ny ampitson'ny Sabata, dia hatramin'izay andro itondranareo ny amboara ho fanatitra ahevaheva, dia fito herinandro mipaka. » (Levitikosy 23:16) « Dia amin'ny ampitson'ny Sabata fahafito no hahataperan'ny andro dimam-polo hisainareo, dia manatera fanatitra hohanina vaovao ho an'i Jehovah indray. »
Toy Izao Ny FanazavanaNy ampitson’ny nahatongavan’ny Zanak’Isiraely tao Sinay, dia niakatra tao an-tendrombohitra i Mosesy mba hiresaka amin’Andriamanitra, handray ny toromarika momba ny Fanekeny (Eks 19:3-6). Tamin’ny 2 Sivana io. Raha vao tafidina avy any an-tendrombohitra kosa izy dia namory ny olona sy nitatitra ny tenin’i Jehovah (and 7-8a). Tamin’ny 3 Sivana io. Ny ampitson’io indray, izany hoe ny 4 Sivana, dia niverina tany an-tendrombohitra izy hilaza ny valin-tenin’ny olona tamin’Andriamanitra (and 8b-9). Dia nandidy an’i Mosesy Jehovah mba hanamasina ny olona “anio sy ampitso”, mba hahavonona azy ireo hiseho eo anatrehany amin’ny andro fahatelo (and 10-11). Ny teny hoe “anio sy ampitso” dia manondro ny 4 sy 5 Sivana. Ary dia niseho teo anatrehan’i Jehovah ny olona tamin’ny 6 Sivana –andron’ny Pentekosta voalohany. Tamin’io andro io indrindra no nanononan’i Jehovah mivantana tamin’ny feo mahery ny Didy folo teo anatrehan’ny Zanak’Isiraely, araka izay voatantara ao amin’ny Eks 20:1-17, manomboka amin’ny hoe: (Eks 20:2) « Izaho no Jehovah Andriamanitrao, Izay nitondra anao nivoaka avy tany amin'ny tany Egypta, tamin'ny trano nahandevozana. » (Eks 20:3) « Aza manana andriamani-kafa, fa Izaho ihany. » …
Ny zava-nitranga, manodidina ny nitenenan'Andriamanitra ny Didy Folo, dia tena mampitolagaga sy mampatahotra, ka dia tsy hiresaka afa-tsy amin'i Mosesy ny vahoaka. Noho ny feon'ny anjomara, sy ny tselatra ary ny kotroka, dia natahotra ny ain'izy ireo ny vahoaka (Eksodosy 20: 18-21).
Nasehon'i Mosesy tamin'ny vahoaka fa nataon'Andriamanitra fanampiny daholo ireo "tranga manokana" ireo mba hampiseho amin’ny olona ny maha-zava-dehibe ny fanomezana ny Didy Folo. Andriamanitra te-hatoky fa hatahotra ny hanota ny vahoaka. Nahoana? Satria lehibe ny fanekena hataony amin’izy ireo.