PENTEKOSTA VOALOHANY
TAO AN-TENDROMBOHITRA SINAY :
FANEKEN’ANDRIAMANITRA SY NY FIANGONANA
TENIN’ANDRIAMANITRA
Eksodosy 20:1-17
Lioka 19:11-17Asan’ny Apostoly 2:16-21
Eksodosy 20:1-17
[Ny nanomezan'Andriamanitra ny Didy Folo]
(Eksodosy 20:1) « Dia nilaza izao teny rehetra izao Andriamanitra ka nanao hoe: »
(20:2) « Izaho no Jehovah Andriamanitrao, Izay nitondra anao nivoaka avy tany amin'ny tany Egypta, tamin'ny trano nahandevozana. » (20:3) « Aza manana andriamani-kafa, fa Izaho ihany. »
(20:4) « Aza manao sarin-javatra voasokitra ho anao, na ny mety ho endriky ny zavatra izay eny amin'ny lanitra ambony, na izay ety amin'ny tany ambany, na izay any amin'ny rano ambanin'ny tany. » (20:5) « Aza miankohoka eo anatrehany, ary aza manompo azy; fa Izaho, Jehovah Andriamanitrao, dia Andriamanitra saro-piaro ka mamaly ny heloky ny ray amin'ny zanaka hatramin'ny zafiafy sy ny zafindohalika, dia amin'izay mankahala Ahy; » (20:6) « nefa kosa mamindra fo amin'ny olona arivo mandimby izay tia Ahy ka mitandrina ny didiko. »
(20:7) « Aza manonona foana ny anaran'i Jehovah Andriamanitrao; fa tsy hataon'i Jehovah ho tsy manan-tsiny izay manonona foana ny anarany. »
(20:8) « Mahatsiarova ny andro Sabata hanamasina azy. » (20:9) « Henemana no hiasanao sy hanaovanao ny raharahanao rehetra. » (20:10) « Fa Sabatan'i Jehovah Andriamanitrao ny andro fahafito; koa aza manao raharaha akory ianao amin'izany, na ny zanakao-lahy, na ny zanakao-vavy, na ny ankizilahinao, na ny ankizivavinao na ny biby fiompinao, na ny vahininao izay tafiditra eo am-bavahadinao. » (20:11) « Fa henemana no nanaovan'i Jehovah ny lanitra sy ny tany sy ny ranomasina mbamin'izay rehetra ao aminy, dia nitsahatra Izy tamin'ny andro fahafito; izany no nitahian'i Jehovah ny andro Sabata sy nanamasinany azy. »
(20:12) « Manaja ny rainao sy ny reninao mba ho maro andro ianao ao amin'ny tany izay omen'i Jehovah Andriamanitrao ho anao. »
(20:13) « Aza mamono olona. »
(20:14) « Aza mijangajanga. »
(20:15) « Aza mangalatra. »
(20:16) « Aza mety ho vavolombelona mandainga hanameloka ny namanao. »
(20:17) « Aza mitsiriritra ny tranon'ny namanao; aza mitsiriritra ny vadin'ny namanao, na ny ankizilahiny, na ny ankizivaviny, na ny ombiny, na ny borikiny, na izay mety ho an'ny namanao akory aza. »
Lioka 19:11-17
[Ny fanoharana ny amin’ny farantsa folo](Lioka 19:11) « Ary raha mbola nihaino izany ny olona, dia nandroso niteny ihany Jesosy ka nanao fanoharana, satria efa akaiky an'i Jerosalema Izy, ka nataon'ny olona fa hiseho faingana ny fanjakan'Andriamanitra. » (19:12) « Dia hoy Izy: Nisy andriandahy anankiray nandeha nankany an-tany lavitra mba handray fahefana hanjaka, dia hiverina. » (19:13) « Dia niantso folo lahy tamin'ny mpanompony izy ary nanome azy farantsa* folo ka nanao taminy hoe: Mandrantoa mandra-pihaviko. [*Gr. mina = drakma = tokony ho farantsa 15] » (19:14) « Fa ny vahoakany* nankahala azy, dia nampitondra reny nanaraka azy nanao hoe: Tsy manaiky hanjakan'iny lehilahy iny izahay.[*Na: vahoaka namany] » (19:15) « Ary nony tafaverina izy, rehefa nandray fahefana hanjaka, dia nasainy nantsoina hankeo aminy izany mpanompo nomeny ny vola izany mba hahitany izay azony tamin'ny fandrantoana. » (19:16) « Dia tonga ny voalohany ka nanao hoe: Tompoko, ny farantsanao iray efa nahazoana tombony farantsa folo. » (19:17) « Ary hoy izy taminy: Tsara izany, ry mpanompo tsara; satria nahatoky tamin'ny kely indrindra ianao, dia manapaha tanàna folo. » (19:18) « Dia tonga ny anankiray koa ka nanao hoe: Tompoko, ny farantsanao iray efa tonga farantsa dimy. » (19:19) « Ary hoy koa izy tamin'io: Manapaha tanàna dimy koa ianao. » (19:20) « Fa tonga kosa ny anankiray ka nanao hoe: Tompoko, indry ny farantsanao, izay notehiriziko voafono amin'ny mosara. » (19:21) « Fa natahotra anao aho, satria olona mila voatsiary ianao ka maka izay tsy napetrakao, ary mijinja izay tsy nafafinao. » (19:22) « Ary hoy ny tompony taminy: Ny vavanao no hitsarako anao, ry mpanompo ratsy fanahy: fantatrao fa izaho dia olona mila voatsiary ka maka izay tsy napetrako, ary mijinja izay tsy nafafiko; » (19:23) « koa nahoana no tsy napetrakao tamin'ny mpanana vola ny volako, ka rehefa tonga aho, dia ho nandray ny ahy mban-janany? » (19:24) « Ary hoy izy tamin'izay nitsangana teo anilany: Alao ny farantsa eny aminy, ka omeo ilay manana farantsa folo » (19:25) « (Fa hoy ireo taminy: Tompoko, efa manana farantsa folo izy.) » (19:26) « Lazaiko aminareo: Izay rehetra manana dia homena; fa ny amin'izay tsy manana, na dia izay ananany aza dia halaina aminy. »
(19:27) « Fa ireo fahavaloko tsy nanaiky hanjakako ireo, dia ento aty , ka vonoy eto anatrehako. »
Asan’ny Apostoly 2:16-21
[Ny nilatsahan'ny Fanahy Masina tamin'ny Andro Pentekosta, sy ny tori-teny nataon'i Petera tamin'izany]
(Asan'ny Apostoly 2:16) « Fa izao ilay nampilazaina an'i Joela mpaminany hoe: » (2:17) « Ary amin'ny andro farany, hoy Andriamanitra, no handatsahako ny Fanahiko amin'ny nofo rehetra; Ary ny zanakalahinareo sy ny zanakavavinareo haminany, Ary ny zatovonareo hahita fahitana, Ary ny lahiantitrareo hanonofy; » (2:18) « Ary ny mpanompoko, na lahy na vavy, dia handatsahako ny Fanahiko amin'izany andro izany, ka dia haminany izy; » (2:19) « Ary hanisy fahagagana eny amin'ny lanitra ambony Aho sy famantarana amin'ny tany ambany, dia rà sy afo ary zavon'ny setroka; » (2:20) « Ny masoandro hampodina ho aizina, Ary ny volana ho rà, alohan'ny hahatongavan'ny andron'i Jehovah, dia ilay sady lehibe no malaza; » (2:21) « Ary na zovy na zovy no hiantso ny anaran'i Jehovah dia hovonjena (Joela 3. 1-5). »
TORITENY
1. [Ny nanomezan'Andriamanitra ny Didy Folo]
2. 2. [Ny nilatsahan'ny Fanahy Masina tamin'ny Andro Pentekosta, sy ny tori-teny nataon'i Petera tamin'izany]
3. [Ny fanoharana ny amin’ny farantsa folo]
ð Fanekena Taloha sy Fanekena Vaovao: fatotra roa mifameno, miantoka ny fanorenana ny Fanjakana Arivo Taona
Eksodosy 20:1-17
NY NANOMEZAN'ANDRIAMANITRA NY DIDY FOLO
Ny fanomezana ny Didy Folo dia nanorina ny lalàna izay iorenan'ny fanekena taloha, nefa fototra iorenan’ny Fanjakan’Andriamanitra.
Fanazavana ny fomba nanomezan’Andriamanitra ny didy folo
Rehefa nanaiky am-bava ny hihaino ny feon’i Jehovah sy hitandrina ny fanekeny ny Zanak’Isirely, dia nambaran’i Jehovah fa ho rakitra soa ho Azy mihoatra noho ny firenena rehetra izy ireo. Dia nolazainy fa ho fanjaka-mpisorona sy ho firenena masina ho Azy izy ireo. (Eksodosy 19: 5-6). Izy ireo efa nilaza tamin’i Jehovah hoe: “Izay teny rehetra nolazain’i Jehovah dia hataonay” (Eks 19:8). Koa dia nambaran’i Jehovah am-pahibemaso tamin’izy ireo ny Didy folo, izay lalàna fototra iorenan'ilay fanekena nataony taminy.
(Eks 20:18) « Ary ny olona rehetra nandre ny kotrokorana sy ny feon'ny anjomara ary nahita ny helatra sy ny tendrombohitra nivoa-tsetroka, … dia toran-kovitra izy ka nijanona teny lavitra eny. » (20:19) « Dia hoy izy tamin'i Mosesy: Aoka ihany ianao no hiteny aminay, dia hihaino izahay; fa aza Andriamanitra no miteny aminay, fandrao maty izahay. » (20:20) « Dia hoy Mosesy tamin'ny olona: Aza matahotra; fa tonga Andriamanitra mba hizaha toetra anareo, ary mba ho eo anatrehan'ny tavanareo ny fahatahorana Azy, mba tsy hanotanareo. »
ð Tamin’ny fomba mahagaga sy mahatalanjona, ary mampiorina ny fahatahorana an’i Jehovah no nanomezany ny didy folo, izay Lalàna nanorenana ny fanekena taloha.
ð Tsarovy fa tamin'ny alàlan'ny fanekena taloha, Andriamanitra dia manana tanjona lehibe ho an'ny Isiraelita fahiny: ho ohatry ny fankatoavana Azy eo imason’izao tontolo izao. Nampanantena azy ireo Andriamanitra fa hahazo fitahiana tsy ambara, nefa azo tsapain-tanana izy ireo raha toa ka hankatò ny Didy Folo. (Eksodosy 19: 5-6)
ð Ireo Didy folo ireo ihany anefa no Lalàna mifehy ny Fanjakan’Andriamanitra manontolo.
NY LALÀN’ANDRIAMANITRA, EFA NISY TALOHAN’I ABRAHAMA
Mba hahatakarana tsara ny amin’ny fanekena Taloha sy ny Fanekena Vaovao, dia ilaina apahatsiarovina antsika ny fototra iray tsy azo ialana: Ny lalàna momba ny fitiavan’Andriamanitra dia efa nisy taloha lavitra an’i Adama sy Eva!
Efa fantatsika hatramin’izay fa Andrimanitra dia fitiavana, ary fitiavana toy izany no fifandraisan’Andriamanitra Tsitoha sy Ny Teny hatrany am-piandohana (Ireo mpikambana hatrizay ao amin’ny fianakavian’Andriamanitra): (Jaona 10:30) « Izaho sy ny Ray dia iray ihany. »
Andriamanitra dia nandidy antsika hianatra izany fiainam-pitiavany izany: (1 Jaona 5:3) « Fa izao no fitiavana an'Andriamanitra, dia ny hitandremantsika ny didiny, sady tsy mavesatra ny didiny. »
Inona izany didy nolazain’ny Apostoly Jaona izany ?
Hoy Ny Teny, Izay lasa Jesosy Kristy fony Izy teto an-tany, raha nanontanian’olona tahaka izany:
(Matio 19:18) « Hoy ralehilahy taminy: Inona avy moa? Dia hoy Jesosy: Ny hoe: Aza mamono olona, Aza mijangajanga, Aza mangalatra, Aza mety ho vavolombelona mandainga, » (Matio 19:19) « Manajà ny rainao sy ny reninao (Eks. 20:12-16), ary: Tiava ny namanao tahaka ny tenanao (Lev. 19:18). »
Mazava ho azy fa ny Didy Folo no nolazain’i Jesosy Kristy tamin’izany.
Lalàna ara-panahy sy maharitra mandrakizay ny Didy Folo, ary ny fitiavana no fanatanterahana an’izany lalàna ara-panahy izany (Romana 13:10), manao hoe: « Ny fitiavana tsy manisy ratsy ny namana; koa dia ny fitiavana no fahatanterahana ny lalàna. »
Fitiavana an’Andriamanitra sy fitiavana ny namana no fototry ny lalàna ara-panahiny (Mat 22:36-40). Ny didy efatra voalohany mampianatra antsika ny fitiavana an’Andriamanitra, ary ny enina farany, ho an’ny fitiavana ny namana.
Ary satria Andriamanitra dia fitiavana, (1 Jaona 4:16), koa dia manambara izany toetrany izany ny lalàny. Ary satria ny toetran’Andriamanitra tsy miova na oviana na oviana, (Malakia 3:6 ; Hebreo 13:8), dia tsy miova mandrakizay koa ny lalàny ara-panahy, sady tsy ho foana mandrakizay! (Salamo 111:7-8).
Ny Vokatry ny Fahotana
Nanapaka teto an-tany ny Lalàm-pitiavan’Andriamanitra fony Izy nametraka anjely teto, hitantana sy hamita ny fanamboarana ny tany. Ireo lalàna ireo no nandamina ny asa nataon’ireo anjely ireo, nifehy ny fifandraisany tamin’Andriamanitra ary ny fifandraisan’izy samy izy.
Nisy ny fiadanana sy filaminana, ary fifaliana sy fahavitan-javatra teto an-tany tamin’izany. Niova anefa ny toe-javatra taty aoriana, rehefa nikomy tamin’Andriamanitra i Losifera, izay nampitantanina ny Fanjakana teto: Nanota ny anjely.
(Isa. 14:12-17)
« Endrey! latsaka avy tany an-danitra ianao, ry ilay fitarik'andro, zanaky ny maraina; Voakapa hianjera amin'ny tany ianao, ry ilay mpandripaka firenena. » (Isaia 14:12) « Ary ianao efa nanao anakampo* hoe [*Nitsiriritra]: Any an-danitra no hiakarako, ary ambonin'ny kintan'Andriamanitra no hanandratako ny seza fiandrianako; Dia hipetraka eo an-tendrombohitra, fivoriana any am-parany avaratra aho; » (Isaia 14:13) « Hiakatra ho any ambonin'ny havoan'ny rahona aho ka ho tahaka ny Avo Indrindra; » (Isaia 14:14)
(2 Petera 2:4) « Fa raha tsy navelan'Andriamanitra ny anjely fony nanota, fa noroahiny ho any amin'ny helo ka natolony ho ao an-davaka maizina* mba hotehirizina ho amin'ny fitsarana, [* Na: (nafatony tamin'ny gadra fahamaizinana)] »
Ny 1/3 ny anjely no nanaraka an’i Losifera nanota, ary efa teo ny Lalàna matoa lazaina fa nanota ny anjely. (Romana 5:13).
Taoriana lavitry ny nanotan’ny anjely vao noforonina Adama sy Eva, ary nampianarina azy ireo ny lalàn’Andriamanitra, sy ny fiadanana azo vakatry ny fitandremana an’ireo. Nampianarina azy ireo koa ny voka-dratsin’ny fandikana ny Lalàna. Nahantona ny fanomezana ny Fanahy Masina tamin’ny olombelona, sy ny fahazoany fiainana mandrakizay. (Gen 3:22-24).
(Genesisy 3:22) « Ary hoy Jehovah Andriamanitra: Indro, ny olona efa tonga tahaka ny anankiray amintsika ka hahalala ny tsara sy ny ratsy; ary ankehitriny, andrao haninjitra ny tànany izy ka hakany koa ny hazon'aina, ary hohaniny, ka ho velona mandrakizay izy; » (Genesisy 3:23) « ka dia nesorin'i Jehovah Andriamanitra tamin'ny saha Edena izy hiasa ny tany izay nanalana azy. » (Genesisy 3:24) « Eny, noroahiny ny olona; ary nampitoeriny tany atsinanan'ny saha Edena ny kerobima sy ny lelafon'ny sabatra mihebiheby hiambina ny lalana mankany amin'ny hazon'aina. »
Nomen’Andriamanitra safidy anefa i Adama sy Eva, na hanaraka ny didy na tsia. Nisafidy ny hanota izy ireo. Dia noroahin’Andriamanitra tao amin’ny saha Edena izay nitoerany izy ireo, sady nosakanana taminy ny làlana hahazoana ny Fanahy Masina (nambaran’ny hazon’aina).
Nanomboka tamin‘izany, dia tsy nomen’Andriamanitra ny fahalalana marina sy ny fahatakarana ny hevi-panahin’ny Lalàna, izay mitaky fanomezana ny fanahy Masina, raha tsy ho an’ny olona vitsy ihany, izay nantsoiny hanatanteraka iraka manokana (Jaona 6:44 ; 1 Petera 1:10-12): Abela, Noa, Abrahama, Isaka, Jakoba, Josefa, Mosesy, Josoa, Gideona, Samsona, Davida, Solomona, sy ireo mpaminan’i Jehovah rehetra tamin’ny Testamenta Taloha. Taorian’ny niakaran’i Jesosy Kristy any an-danitra vao narotsaka tamin’ny olona masina rehetra ny Fanahy Masina, nanomboka tamin’ny Pentekosta nanorenana ny Fiangonana ara-panahy voalohany.
Amin’ny fiverenan’i Kristy vao hahazo ny hevi-panahin’ny Lalàna sy izay momba ny Fanjakan’Andriamanitra ny olombelona rehetra, rehefa rava ny fanjakan’i Satana (Apokalypsy 20:1-3).
Mandra-pahatongan’izay, dia ireo voaloham-bokatra ihany no hahatakatra izany, satria notorontoronin’ny Fanahy Masina, ka ho tena iray amin’Andriamanitra.
Ireo Fanekena Nataon’i Jehovah Tamin’ny Olombelona
Jehovah nanao fanekena maro tamin’ny olombelona.
Tao ireo fanekena tamin’ireo Patriarka Noa sy Abrahama ary ny mpanjaka Davida.
Nanao fanekena tamin’ny Zanak’Isiraely fahiny koa Izy, izay natsoina taty aoriana hoe « Fanekena Taloha ». Nefa ny fanekena lehibe indrindra — « ny Fanekena Vaovao » — dia hotanterahina any aoriana!
Fa milaza inona marina moa ny Fanekena Taloha sy ny Fanekena Vaovao ? Inona no ambaran’ny Baiboly ho tsin’ny Fanekena Taloha, ary nahoana no ilaina ny Fanekena Vaovao ?
Ahoana no fomba hidirantsika amin’ny Fanekena Vaovao ataon’Andriamanitra, ary rahoviana no hanaovana izany ?
Ny momba an’izany no voatantara ao amin’ny Asan’ny Apostoly 2:16-21
Ny Nahaterahan'ny Fiangonan’Andriamanitra
Ny Asan’ny Apostoly 2 dia mirakitra hetsika iray hafa manan-danja amin'ny fahatakarantsika ny Pentekosta. Tamin’ny taona A.D. 31, nandritry ny Pentekosta, no nilatsaka tao am-piangonana ny Fanahy Masina. Mitovitovy amin'ny zava-nitranga tamin'ny Pentekosta voalohany, nisy “tranga manokana” manaitra amin'ity hetsika ity. Nisy rivotra mahery nifofofofo, nisy lela toy ny afo, ary izay rehetra nivory dia nandre ny mpianatra niteny tamin'ny fitenin’izy ireo (Asa 2: 2-12).
Nohazavain’i Petera ny zava-niseho teto, ho an’ireo Jiosy mpivavaka izay nitandrina ny Pentekosta. (Asa. 2: 16-21) « Fa izao ilay nampilazaina an'i Joela mpaminany hoe: » (2: 17) « Ary amin'ny andro farany, hoy Andriamanitra, no handatsahako ny Fanahiko amin'ny nofo rehetra; Ary ny zanakalahinareo sy ny zanakavavinareo haminany, Ary ny zatovonareo hahita fahitana, Ary ny lahiantitrareo hanonofy; » (2: 18) « Ary ny mpanompoko, na lahy na vavy, dia handatsahako ny Fanahiko amin'izany andro izany, ka dia haminany izy; » (2: 19) « Ary hanisy fahagagana eny amin'ny lanitra ambony Aho sy famantarana amin'ny tany ambany, dia rà sy afo ary zavon'ny setroka; » (2: 20) « Ny masoandro hampodina ho aizina, ary ny volana ho rà, alohan'ny hahatongavan'ny andron'i Jehovah, dia ilay sady lehibe no malaza; » (2: 21) « ary na zovy na zovy no hiantso ny anaran'i Jehovah dia hovonjena (Joela 3: 1-5). »
Nanome toromarika ny olona i Petera fa ny zava-niseho tamin'ity Pentekosta ity dia nanaporofo fa tsy nivadika tamin'ny fampanantenany Andriamanitra. Andriamanitra nanomboka nizara ny Fanahiny Masina amin'ny nofo rehetra. Ao amin'ny Asa 2: 38-39, dia noferan'i Petera ny fahatanterahan'ny fampanantenana amin'izao androntsika izao (Pentekosta taona 31 mandra-pahatongan'ny "Andron'ny Tompo"): Ho amin’ireo olona izay nantsoin'Andriamanitra manokana hoe “ny Fiangonana”. Tokony hahatsapa isika fa ny fanomezana ny Fanahin'Andriamanitra dia tsy natao hisolo ny Didy Folo. Ny fanomezana ny Fanahy Masina dia maneho ny fanomezan'Andriamanitra ny Fiangonany ny fomba hitandremana ny Didy Folo! (Fanekena vaovao: sady amin’ny Soratry ny Lalàna no amin’ny Fanahin’ny Lalàna.)
Ny zava-niseho tamin'ity Pentekosta ity dia nanamarika ny nahaterahan'ny Fiangonana. Tsarovy fa firenena ara-panahin'Andriamanitra ny Fiangonana. Takin'Andriamanitra ny Fiangonana hanao izay tsy vitan'ny firenena Isiraely : Modely ho an'izao tontolo izao amin'ny fankatoavana an’Andriamanitra ny Fiangonana. Nanoratra ho an'ny Fiangonana i Petera hoe: (1 Petera 2: 9). « Fa ianareo kosa dia taranaka voafidy, "fanjaka-mpisorona, firenena masina" (Eks. 19.6), olona nalain'Andriamanitra ho an'ny tenany, mba hilazanareo ny hatsaran'ilay niantso anareo hiala tamin'ny maizina ho amin'ny fahazavany mahagaga ». (1 Petera 2:10) « dia ianareo izay tsy firenena akory fahiny, fa ankehitriny efa olon'Andriamanitra; izay tsy namindrana fo, fa ankehitriny efa namindrana fo (Hos. 2.25). »
Tokony ho fantatsika izao zavatra izao: eo amin’ny drafitr’Andriamanitra, izao tontolo izao dia tsy hanaiky ny Fiangonana ho "firenena masina", raha tsy efa miverina i Jesosy Kristy, manomboka ny fanjakana arivo taona. Mbola hiarantsika bebe kokoa ny momba izany any aoriana.
Lioka 19:11-27
Fanoharana ny amin'ny farantsa folo
Faminaniana Ny Amin’ny Fiverenan’i Kristy: Fanjakana Arivo Taona
Lioka 19: 11-27 dia maneho fanoharana mampisongadina izay ho fizotry ny fihavian'ny Fanjakan'Andriamanitra. Ao anatin'io fanoharana io, Kristy mampitovy ny tenany amin'ny Andriandahy izay nandeha any “an-tany lavitra” (mariky ny fiverenany any amin'ny Ray any an-danitra, mandritry ny 2000 taona eo, mandra-piveriny eto an-tany). Tamin'izany, nino ireo mpianatra fa ny Fanjakan'Andriamanitra dia “ho avy eo noho eo”; noho izany, te hampiseho tamin’izy ireo i Kristy fa mbola fotoana maro no handalo vao ho tonga izany.
Ao amin'io fanoharana io Kristy dia tena manohitra ny fahadisoan-kevitra lehibe izay manao hoe: ny Fanjakan' Andriamanitra dia hajoro amin'ny fotoana hanorenana ny Fiangonana; satria aorian'ny fiverenany eto an-tany vao hapetraka izany Fanjakana izany.
“Ilay Andriandahy”, amin'io fanoharana io, “miantso” ireo mpanompony folo” (ohatr'ireo kristiana antsoina hivoaka tamin’ny fomban'izao tontolo izao), ary milaza aminy hampitombo ny teti-bidin'ny “farantsa” izay nomeny ny tsirairay avy ho renivola. Marihana fa ilay farantsa dia maneho karazana zava-panahy fototra. Tadidio fa fanoharana no resaka, ary Kristy tsy tena nanome farantsa azy ireo. Hoy Izy nilaza tamin'ny mpanompony: “ampitomboy ireo farantsa ireo mandra-pihaviko”, na hoe: "ampitomboy ny teti-bidin'ny farantsa izay nomeko anareo". Mandritry ny fotoana tsy maha eo an'ilay Andriandahy anefa, maro tamin'ireo mpanompony no nilaza, hoe: “tsy manaiky hanjakan'iny lehilahy iny izahay” (Lio 19:14b). Ilaina ny mahazo tsara ny antony nanosika tao ambadik'izany fanambarana izany.
Ireo “tompontany” ireo nahafantatra tsara fa ilay lehilahy (i Kristy) hiverina “hanjaka” eto an-tany. Tsy te hiditra amin'ny raharaha izy ireo ary nandà ny fahefana amin'ny fitondrany (ny fanjakany), izany hoe nandà ny fandraisan'anjaran'izy ireo (and 27). Nahafantatra izy ireo fa ilay Fanjakan'Andriamanitra dia ho fitondrana manam-pahefana amin'izao tontolo izao. Tadidio fa ilay fanoharana miatomboka amina lehilahy izay niverina any an-danitra mba handray fahefana hanjaka, avy eo hiverina indray. Ho vankintsika indray ny Daniela 7: 14, 27, izay milaza fa Andriamanitra hanome ilay fahefana fara-tampony an'i Kristy mialoha ny fiverenany sy hanjakany miaraka amin'ny olo-masina).
(Daniela 7:14) « Ary nomena fanapahana sy voninahitra ary fanjakana Izy, mba hanompoan'ny fokom-pirenena sy ny firenena ary ny samy hafa fiteny rehetra Azy; ny fanapahany dia fanapahana mandrakizay ka tsy ho tapaka, ary ny fanjakany tsy ho rava. »
(Daniela 7:27) « Ary ny fanjakana sy ny fanapahana ary ny fahalehibiazan'ny fanjakana eny ambanin'ny lanitra rehetra dia homena ny olo-masin'ny Avo Indrindra; ny fanjakany dia fanjakana mandrakizay, ary ny fanapahana rehetra dia hanompo sy hanoa Azy. »
Amin'ny fiaviany, hiantso ny mpanompony tsirairay eo anoloany i Kristy mba hanaovan'izy ireo tatitra ny amin'ny fomba nampitomboany ilay farantsa izay napetraka taminy. Ny sasany nahazo tombony dimy, ny sasany folo, sy ny sisa sy ny sisa; nefa nisy mpanompo anankiray izay nandevina ny talentany, ary tsy nanao na inona na inona. Kristy anefa te hahafantatra izay fomba nampitomboan'izy ireo izany nandritra ny fotoana tsy naha teo Azy.
Ilay voalohany nahazo tombony folo, ary Kristy naneho izay valim-pitiany tamin'ny filazana hoe : “Tsara izany, ry mpanompo tsara; satria nahatoky tamin'ny kely indrindra ianao, dia manapaha tanàna folo.” (Lio 19:17).
Ilay mpanompo nahazo tombony farantsa dimy nandray fanapahana “tanàna dimy”. Satria antsasaky ny azon'ilay voalohany no azony, dia mihena antsasany koa ny valim-pitiany. Noho izany, ireo lehilahy ireo nahazo “fahefana” - ary samy napetraka tamin'ny toeram-pitantanana “tanàn-dehibe” izy ireo. Ny valim-pitian'izy ireo dia ny miara-“manjaka” amin'i Kristy, (Joda 14), ao amin'ny Fanjakany maneran-tany. Mazava ho azy izany!
IIay mpanompo izay namono ny farantsany tao anaty lamba, ka nandevina azy, dia nanary ny anjarasoa tokana hanjakany amin'ny Fanjakan'Andriamanitra. Izao no voasoratra: “Ary hoy ny tompony taminy (Jesosy, ilay Andriandahy): Ny vavanao no hitsarako anao, ry mpanompo ratsy fanahy: fantatrao fa izaho dia olona mila voatsiary ka maka izay tsy napetrako, ary mijinja izay tsy nafafiko;” (Lio 19:22).
Io mpanompo anakiray io tsy mba nino. Tsy namokatra mihitsy izy tamin’ny fiainany, ary tsy nanolo-tena hikatsaka ny hanjaka amin’ny tanàna lehibe ao amin’ny Fanjakan’Andriamanitra. Nomen’i Kristy an’ilay nahazo tombony folo ilay farantsany, ary nahazo tombony ankoatry ny efa azony izy ho valim-pitiany.
Ireo tanàna lehibe avotra tamin’ny fitantanan’ilay mpanompo ratsy fitondran-tenany, dia nitadiavan’i Kristy olona hafa hitantana azy, raha tsy izany tavela teo fotsiny, tsy misy fahefana voatendry hitantana azy, ary tsy misy olona hanoro-làlana azy.
Ilana filazan-tantara kely hahafahantsika mahazo ny dikan’ilay fanoharana. Kristy dia Jiosy iray izay niresaka tamin’ny fanoharana tao amin’ny tanànan’ny Joda. Joda dia anakiray tamin’ny foko roa ambiny folo tamin’ny Zanki’Isiraely. Tsy hita popoka ny folo tamin’izy ireo teo amin’ny taona faha 700 talohan’i Kristy teo ho eo, satria izy ireo dia nanohitra an’i Rehoboama, ilay Zanakalahin’i Solomona. Izy ireo dia nentin'ny Asyriana, ary taty aoriana nifindra monina tao Eoropa avaratra andrefana, ary lasa topontanin'ireo firenena demokratika anglofona any Etats-Unis (Amerika Avaratra), Grande Bretagne, Canada, Australie, Nouvelle-Zélande, ary ny sasany amin'ireo teratanin'ny Eoropa. Tsy nisy afa-tsy ny taranak'i Levy sy Benjamina sisa no niara-monina tamin'ny Jiosy, ary Jerosalema no renivohitra izay nitoerany.
Rehefa miresaka ny fanoharana ny amin'ireo vahoaka nankahala azy ilay Andriandahy sy nilaza hoe: “Tsy te hanjakan'iny lehilahy iny izahay”, dia ny Jiosy no ambara amin'ny hoe vahoaka. Ny tantara dia manoro tsara fa tsy mila ny fahefan'i Jesosy Kristy ireo vahoaka ireo. Izany no tian'i Jaona 1: 11 ho lazaina amin'ny hoe: “Tonga tany amin'ny Azy Izy, fa ny Azy tsy nandray Azy”.
Ireo “mpanompo folo”, (ny Kristiana antsoina amin'izao andro izao), dia fanehoana ny TARANAKA FOLO very tamin'ny Isiraely. Ho an'izy ireo no nanomezan'i Kristy fahafahana hanjaka satria nandà ny fahefany ny Jiosy.
Ny mampalahelo anefa dia izao, maro no tsy mankasitraka an'i Kristy voalazan'ny Baiboly handidy izay tokony hataony. Tsy tian'izy ireo hanjaka amin'ny fiainany Izy, sy hanoro ny fitondran-tenany. Nefa tian'izy ireo ny famonjeny, saingy tsy an-tery.
Tsy misy olona hitantana raha tsy voaporofo aloha hoe manaiky ho tantanina izy! Tsy misy olona afaka ho isan'io Goveremantan'Andriamanitra eran'izao tontolo izao io, raha tsy efa nianatra ho eo ambanin'ny fahefan'io fitondrana io izy, ary mety ho tantanin'Andriamanitra sy Jesosy Kristy ao amin'izao fiainana ankehitriny izao.
Izany no lesona lehibe amin'ny fanoharana ny amin'ny Farantsa Folo.
Rehefa niantso ireo mpanompony i Kristy hanao ireo tatitra, dia nasehony fa indray andro any, hiatrika ny fitsarany avokoa ny rehetra, ary hanao tatitra. Ary tahaka an'ireo Apostoly izay hahazo valim-pitia aminy ho mpanjaka amin'ny taranak'Isiraely roa ambiny folo (Mat 19: 27-28), ny sasany dia handray FAHEFANA goavam-be mba hanjaka amin'ny Renivohitra maro, fa Kristy kosa hitoetra eo amin'ny "Seza fiandrianan'ny Voninahiny". Isika kosa dia voalaza fa hanjaka amin’ny firenena hafa rehetra, na hoe jentilisa.
(Apokalypsy 2:26-27) « Ary izay maharesy ka mitandrina ny asako hatramin'ny farany dia homeko fahefana amin'ny jentilisa; » (2:27) « ary hiandry azy amin'ny tehim-by izy ka hanorotoro azy toy ny fanorotoro vilany tany, dia araka izay efa noraisiko tamin'ny Raiko. »
Rehefa miverina i Kristy, dia sady hanjaka no hampianatra ny Lalàn’ny famonjena amin’ny olombelona. Tsy hanjaka irery anefa Izy fa miaraka amin’ireo zank’Andriamanitra teraka ho Fanahy. Ny Baiboly dia manambara mazava fa ny olona notorontoronin’ny Fanahy Masina mandritry ny taona rehetra tamin’ny tantara, dia hateraka ho Fanahy ao amin’ny Fianakavian’Andriamanitra, ary hanjaka mandritry ny arivo taona (Milenioma) amin’ny olona mbola nofo aman-drà izay hiaina eto an-tany.
Ankoatry ny maha mpanjaka azy, ireo olom-boavonjy ireo dia ho mpisoron’Andriamanitra, izany hoe hampianatra ny olona toy izay nataon’ireo mpisorona tamin’ny andron’ny Zanak’Isiraely. Izao no asan’ny mpisorona: (Malakia 2:7) « Fa ny molotry ny mpisorona tokony hitahiry fahalalana, ary ny lalàna hotadiavina eo am-bavany, satria irak'i Jehovah, Tompon'ny maro, izy. »
Ny fampianarana ny olombelona araka ny fomban’Andriamanitra dia ho lohalaharana ao amin’ny Fanjakana. Handray ny didy mivantana avy amin’i Kristy ireo mpanjaka ireo, ary hampianatra ny Lalàn’Andriamanitra, ny momba an’Andriamanitra sy Jesosy Kristy Mpamonjy, ary ny Planin’ny Famonjena sy ny Fanjakan’Andriamanitra, izay mitondra fiadanana sy fifaliana ho an’ny olon-drehetra.
Vakio: Apokalypsy 1:6; 3:21; 5:10; 12:5a; 19:15; 20:6; Daniela 7:27.
RAHOVIANA NY FANJAKAN'ANDRIAMANITRA NO HAPETRAKA ?
Ny rehetra samy te hahafantatra izay hiverenan'i Kristy. Ny mpianany nanontany azy “... nanao hoe: Lazao aminay izay andro hahatongavan'izany, ary izay ho famantarana ny fihavianao sy ny fahataperan'izao tontolo izao.” (Mat 24:3)
Afaka herin'andro vitsy taoriana, ao amin'ny Asa 1:6-7, alohan'ny hiakaran'i Kristy any an-danitra, nitondra porofo ireo mpianatra fa tsy mbola tena azon'izy ireo tsara, na nekeny, ny amin'ny fanazavana izay nomeny azy ireo. Izany indrindra no nametrahany fanontaniana tamin'i Jesosy indray hoe: “... Tompoko, amin'izao va no hampodianao ny fanjakana ho amin'ny Isiraely? Fa hoy kosa Izy taminy: “Tsy anareo ny hahalala ny andro na ny fotoana izay efa notendren'ny Ray amin'ny fahefany ihany*”. (*Na:-izay nataon'ny Ray ho adidin'ny tenany ihany] (Asa 1:6 -7).
Zava-dehibe tokoa ny manamarika fa folo andro taorian'io tranga io fotsiny dia tafatsangana ny Fiangonan'ny Testamenta Vaovao (Asa 2: 1). Fa maninona Kristy no nilaza hoe “Tsy anareo ny hahalala ny andro na ny fotoana”, raha ny Fiangonana no ilay Fanjakan'Andriamanitra, izay nohariana, saika teo noho eo, (tamin'ny Pentekosta), dia folo andro taoriana?
Tahaka izany koa ny antsika amin'izao fotoana izao. Isika tsy afaka mamantatra hoe rahoviana marina ny Fanjakan'i Kristy no ho avy, nefa isika dia afaka manao fanombanana tsara momba izany. Ao amin'ny Lio 21:31, ny faran'ilay faminaniana lava be mirazotra amin'ny Mat 24, Kristy dia manambara hoe: “Dia tahaka izany koa ianareo, RAHA vao hitanareo izany rehetra izany, dia aoka ho fantatrareo fa efa akaiky mby eo am-baravarana Izy*. (*Na: izany]” (Mat 24:33).
Ny fitambaran'ny andininy 48 manaraka no manome ny valin-teny izay nomen'i Kristy azy ireo; voatantara amin'ny antsipiriany sy mifampitohitohy ireo zava-mitranga hiseho amin'ny fiverenany. Ny andininy faha 36, izay miresaka ny fotoana marina hiverenany, dia milaza hoe: “Fa ny amin'izany andro sy ora izany dia tsy misy mahalala, na dia ny anjelin'ny lanitra aza, [ary na ny Zanaka aza,] afa-tsy ny Ray ihany.” (Mat 24:36).
Tiany ho fantatr'ireo mpianany “Fa hahazo hery izy ireo, "dia ny FANAHY MASINA hilatsaka aminy" (Asa 1:8), nefa tsy amin'izany no fotoana hametrahana ny Fanjakan'Andriamanitra. Tahaka izany koa ho an'izay rehetra miova fo amin'izao andro izao. Isika tsy misy mahafantatra hoe rahoviana marina i Kristy no hiverina, nefa kosa isika mahafantatra fa hahazo hery handrosoana sy handresena ary hitoriana ny Filazantsaran'ny Fanjakan'Andriamanitra ambara-piveriny.
HO TONGA ANIE NY FANJAKANAO
Zatra manao ilay vavaka antsoina hoe “Vavaka nampianarin'ny Tompo” (na hoe Rainay any an-danitra) ny sasan-tsasany amin'ny olona. Maro ny olona mahavita mitanisa tsian-jery izany vavaka izany tsy misy ezaka akory, satria tsy azon'izy ireo fa napetraka ho modely fanaingana ny fanahy ihany izany. Fony mbola efatra taona aho dia nahay ilay vavaka. Izy dia manomboka amin'ny hoe “Rainay izay any an-danitra! Hohamasinina anie ny Anaranao; ho tonga anie ny fanjakanao, hatao anie ny sitraponao ety an-tany tahaka ny any an-danitra ...” (Mat 6:9-10). Io vavaka fohy io dia mitohy amin'ireo andininy telo manaraka.
Eny, ny ankamaroan'ny olona tsy mino ny Tenin' Andriamanitra ny amin'izay miandry ny sivilizasiona. Tsy mino izy ireo hoe tsy mahavita mampitoetra ny filaminana amin'ny hery maha-olombelona. Maro no mihiaka hoe: “Fiadanana, fiadanana; Kanjo tsy misy fiadanana tsinona!” (Jer 6:14; 8:11-14-15), ary ny ankamaroany mbola mino.
Kanefa, firy amin'ireo maro be aman-tapitrisany, izay mahalala sy mitanisa izany, no misaina ilay fehezan-teny hoe “ho tonga anie ny fanjakanao”, na koa hoe “hatao anie ny sitraponao ety an-tany”? Nandritry ny 2000 taona, maro be ireo izay nanandrana nanaiky ireo torohevitr'i Kristy am-bavaka hoe "ho tonga anie ny fanjakanao" no tsy mieritreritra izay dikan'ilay fehezan-teny kely mavesa-danja. Tsy mbola eto an-tany ny Fanjakan'Andriamanitra, fa mivavaha mba hahatongavany.
Efa noeritreretinareo ve io.?
Ireo siantifika malaza manerana izao tontolo izao milaza fa tsy misy afa-tsy governemanta tokana maneran-tany ihany no ahafahana miala amin'izay fifandripahan'ny mponina izay. Nefa ny OLONA dia tsy mahavita mamorona governemanta tahak'izany, satria tsy te hifanaraka ny amin'izany izy ireo.
Amin'ny andininy tsy lavitra loatra, ao anatin'io toko io ihany, Kristy milaza hoe: “Fa katsaho aloha ny fanjakany sy ny fahamarinany, dia hanampy ho anareo izany rehetra izany.” (Mat 6:33).
Tokony hataon’ny Kristiana VOALOHANY indrindra ny mitady ny Fanjakan'Aridriamanitra ao amin'ny fiainan'izy ireo, mihoatra ny zavatra rehetra. Ahoana anefa no hitadiavany izany raha tsy fantany akory izay dikany - na rahoviana ilay izy no hapetraka - na hoe ahoana no hampisy fiantraikan’izany amin'ny famonjena azy? Fanontaniana fanampiny: Iza no mpanjaka ao ? Iza no vahoaka ao ? Inona no lalàna ao? Toerana aiza no hisy azy?
Fantatrareo izany izao !
FEHINY: TSY MAINTSY TONGA NY FANJAKAN'ANDRIAMANITRA
Fotoanany izao hiatrehantsika ny zava-misy araka ny fitrangany; manana safidy roa isika:
1) Na misy ANDRIAMANITRA MATANJAKA tonga mialoha mametraka ILAY FANJAKAN'ANDRIAMANITRA sy manjaka amin'ny fokom-pirenena rehetra, manana TANJAKA mihoatra ny herin'olombelona sy maneran-tany, ary mametraka ny FANDRIAM-PAHALEMANA;
2) Raha tsy izany, dia ho ripaka avokoa ny olombelona rehetra (Mat 24:22)
RAHA ireo mpitondra fivavahana diso làlana (izay mino fa ny FIANGONANA no ilay Fanjakan' Andriamanitra) no manana ny marina, SADY tsy misy GOVERNEMANTA MANERAN-TANY mihoatra ny herin'olombelona apetraky ny Fanjakan'Andriamanitra izay ho avy, DIA TSY MISY AZO ANTENAINA intsony ny olombelona. Ny olombelona rehetra dia tandindomin-doza ho ringana avokoa.
Nefa tsarovy izao nolazain'i Jesosy Kristy izao, raha afaka MINO Azy ianareo (Lio 4:43; Mar 1:15; Mar 16:15-16):
“Fa hoy Jesosy taminy: Tsy maintsv mitory ny teny soa mahafaly ny amin'ny fanjakan'Andriamanitra any amin'ny tanàna hafa koa Aho, satria izany no nanirahana Ahy.” (Lio 4:43)
“Efa tonga ny fotoana, ka efa akaiky ny fanjakan'Andriamanitra; mibebaha ianareo ka minoa ny filazantsara.” (Mar 1: 15).
“Fa izao no sitrapon'ny Raiko, dia ny hahazoan'izay rehetra mijery ny Zanaka ka mino Azy fiainana mandrakizay; ary Izaho hanangana azy amin'ny andro farany.” (Jao 6:40).
“Izay mihinana ny nofoko sy misotro ny rako no manana fiainana mandrakizay; ary Izaho hanangana azy amin'ny andro farany.” (Jao 6:54).
“Mandehana any amin'izao tontolo izao ianareo, ka mitoria nv Flazantsara amin'ny olombelona rehetra”. (Mar 16:15) Izay mino sy atao batisa no hovonjena; fa izay tsy mety mino no hohelohina.” (Mar 16:16).
Izay mino ny Filazantsaran'ny Fanjakan'Andriamanitra sy mibebaka, ka atao batisa amin'ny rano sy ny Fanahy Masina no ho vonjena hiditra ao rehefa miverina Jesosy Kristy!
Aiza no ametrahanao ny finoanao? Ao amin'ny tenin'Andriamanitra ve? Sa ao amin'ny fampianarana foana, mpamitaka sy manompo sampy ataon'izay antsoina hoe “Kristianisma” - izay avy amin'ny “fomba lazaina hoe Kristiana” milaza fa ny FIANGONANA no Fanjakan'Andriamanitra, na koa hoe ny Fanjakan'Andriamanitra dia tsy inona fa fahatsapana tsy mazava sy maivan-danja “ao am-pon'ny olona rehetra”. Tena fotoanany mihitsy izao hahafantaranao hoe iza ireo mpaminany sandoka ireo, ary IZA ireo tena mampianatra marina ny tena Tenin'Andriamanitra !
Ny fanoharana nomen’i Jesosy ny amin’ny farantsa folo, dia fanazavana an’ohatra izay hiseho ami’ny fiverenan’i Jesosy manangana indray ny Fanjakan’Andriamanitra eto an-tany.
Fisaorana: “Ho an'ilay mipetraka eo ambonin'ny seza fiandrianana sy ho an'ny Zanak'ondry anie ny saotra sy ny haja sy ny voninahitra ary ny fanjakana mandrakizay mandrakizay.” Amena. (Apo 5: 13).