MANDROSO HO ANY AMIN’NY FANJAKAN’ANDRIAMANITRA
MIOMÀNA HANAMBADY AN'I KRISTY
TENIN’ANDRIAMANITRAGenesisy 22:15-19Lioka 1:68-802Petera 3:13-18 Genesisy 22:15-19[Ny nizahan’Andriamanitra toetra an’i Abrahama]
(Genesisy 22:15) « Dia niantso an'i Abrahama fanindroany tany an-danitra Ilay Anjelin'i Jehovah » (22:16) « ka nanao hoe: Ny tenako no nianianako, hoy Jehovah: Satria nanao izany zavatra izany ianao ka tsy niaro ny zanakao, ilay lahitokanao, » (22:17) « dia hitahy anao tokoa Aho ary hahamaro dia hahamaro ny taranakao, ho tahaka ny kintana eny amin'ny lanitra sy ho tahaka ny fasika izay any amoron-dranomasina; ary ny taranakao hahazo ny vavahadin'ny fahavalony; » (22:18) « ary amin'ny taranakao no hitahiana ny firenena rehetra ambonin'ny tany, satria nanaiky ny teniko ianao. » (22:19) « Ary Abrahama dia niverina nankeny amin'ny zatovony; dia niainga izy ka niaraka nankany Beri-sheba; ary Abrahama dia nonina tany Beri-sheba. »
Lioka 1:68-80
[Ny nahaterahan’i Jaona Mpanao-batisa]
(Lioka 1:68) « Isaorana anie ny Tompo Andriamanitry ny Isiraely; Fa nitsinjo ny olony Izy ka nanao fanavotana ho azy, » (1:69) « Ary nanangana tandro-pamonjena ho antsika amin'ny taranak'i Davida mpanompony Izy » (1:70) « (Araka izay nampilazainy ny mpaminaniny masina hatramin'ny fahagola), » (1:71) « Dia famonjena antsika amin'ny fahavalontsika, sy amin'ny tànan'izay rehetra mankahala antsika; » (1:72) « Manefa famindram-po amin'ny razantsika Izy sady mahatsiaro ny fanekeny masina, » (1:73) « Dia ny fianianana izay nianianany tamin'i Abrahama razantsika, » (1:74) « Hanao izay hahazoantsika hanompo Azy tsy amin-tahotra, satria afaka amin'ny fahavalontsika isika, » (1:75) « Amin'ny fahamasinana sy ny fahamarinana eo anatrehany amin'ny andro rehetra hiainantsika. » (1:76) « Ary ianao, ry zaza, dia hatao hoe mpaminanin'ny Avo Indrindra; Fa hialoha eo anatrehan'ny Tompo ianao hamboatra ny lalany. » (1:77) « Hanome ny olony ny fahalalam-pamonjena amin'ny famelana ny helony, » (1:78) « Noho ny halehiben'ny famindram-pon'Andriamanitsika, izay hiposahan*'ny mazava avy any amin'ny avo ho antsika.[*Na: niposahan'] » (1:79) « Hamirapiratra amin'izay mipetraka ao amin'ny maizina sy ao amin'ny aloky ny fahafatesana, Hanitsy ny diantsika ho amin'ny lalam-piadanana. » (1:80) « Ary ny zazakely nitombo ka nihahery tam-panahy; ary nitoetra tany an-efitra izy ambara-pahatongan'ny andro nisehoany tamin'ny Isiraely. »
2 Petera 3:13-18[Ny amin'ny hihavian'ny Tompo, sy fananarana noho izany]
(2 Petera 3:13) « Kanefa isika, araka ny teny fikasany, dia manantena lanitra vaovao sy tany vaovao (Apo 21:1; Jerosalema vaovao), izay itoeran'ny fahamarinana. » (3:14) « Koa amin'izany, ry malala, satria manantena izany zavatra izany ianareo, dia efa mazotoa mba ho hita tsy manan-tsiny amam-pondro eo anatrehan'ny Tompo amin'ny fihavanana. » (3:15) « Ary ny fahari-pon'ny Tompontsika dia ekeo ho famonjena, tahaka ny voasoratr'i Paoly, rahalahy malalantsika taminareo koa araka ny fahendrena nomena azy, » (3:16) « tahaka ny ataony ao amin'ny epistiliny rehetra koa, fa milaza izany zavatra izany ao aminy izy; ary amin'ireo efa misy zavatra saro-pantarina, izay aolan'ny olona kely fahalalana sady tsy miorina tsara, tahaka ny anaovany ny teny sasany amin'ny Soratra Masina koa, ka mahatonga fahaverezana ho an'ny tenany. » (3:17) « Koa, satria fantatrareo rahateo izany, ry malala, dia tandremo fandrao ho voataonan'ny fahadisoan'ny ratsy fanahy ianareo ka ho lavo hiala amin'izay iorenanareo; » (3:18) « fa mitomboa amin'ny fahasoavana sy ny fahalalana an'i Jesosy Kristy, Tompontsika sy Mpamonjy. Ho Azy anie ny voninahitra ankehitriny sy mandrakizay. Amena. »
TORITENY Dr. Daniel Rakotondravony, Fiangonan’Andriamanitra MirayMiomàna Hanambady An'i Kristy
Ø Ny lesona lehibe indrindra amin'ny Pentekosta dia mampianatra antsika fa tokony hiomana isika tsirairay, satria hanambady an'i Jesosy Kristy ny Fiangonana rehefa miverena Izy. (Apokalypsy 19: 7-8).
Apokalypsy 19:7 « Aoka isika hifaly sy ho ravoravo ka hanome voninahitra Azy; fa tonga ny fampakaram-badin'ny Zanak'ondry. Ka efa niomana ny vadiny. » (19:8) « Ary nasaina nitafy rongony fotsy madinika sady madio no mangatsakatsaka izy; fa izany rongony fotsy madinika izany dia ny asa marina ataon'ny olona masina. »
Manomana ny tenantsika isika amin'ny fitandremana ny Didy Folo.
Ø Ao amin’ny 2 Petera 3:13-18: Nasain'i Petera mitombo amin’ny "fahasoavana sy fahalalana an’i Jesosy Kristy" ny fiangonana.
Amin'ny alàlan'ny Fanahy Masin'Andriamanitra irery ihany no ahafahantsika manao izany.
(2 Petera 3:13-14) « Kanefa isika, araka ny teny fikasany, dia manantena lanitra vaovao sy tany vaovao, izay itoeran'ny fahamarinana. » (3:14) « Koa amin'izany, ry malala, satria manantena izany zavatra izany ianareo, dia efa mazotoa mba ho hita tsy manan-tsiny amam-pondro eo anatrehan'ny Tompo amin'ny fihavanana. »
Rahoviana no hataon’Andriamanitra ny fanavaozana ny tany sy ny lanitra (lanitra vaovao sy ny tany vaovao)? Ireto manaraka ireto ny tenin’Andriamanitra miresaka izany:
(Isaia 65:17) « Fa, indro, Izaho mahary lanitra vaovao sy tany vaovao, ka dia tsy hotsarovana intsony ny taloha, na ho mby ao an-tsaina akory aza. »
(Isaia 66:22) « Fa tahaka ny lanitra vaovao sy ny tany vaovao, izay hataoko, no haharitra eo anatrehako, hoy Jehovah, dia toy izany ny haharetan'ny taranakareo sy ny anaranareo. »
(2 Petera 3:13) « Kanefa isika, araka ny teny fikasany, dia manantena lanitra vaovao sy tany vaovao, izay itoeran'ny fahamarinana. »
[Ny amin'i Jerosalema vaovao] (Apokalypsy 21:1) « Ary nahita lanitra vaovao sy tany vaovao aho; fa efa lasa ny lanitra voalohany sy ny tany voalohany, ary ny ranomasina dia tsy misy intsony. »
Fanavaozana ny tarehin’ny tany : Aorian’ny fandringanana ny ratsy fanahy
Ny Apo 20:14 dia milaza fa ny fahafatesana sy ny fiainan-tsi-hita dia hatsipy ao anaty farihy afo. Rehefa levon’ny afo ny ratsy fanahy, dia hodiovina koa ny tarehin’ny tany ka ho levonin’ny afo avokoa ny asa ratsy rehetra napetraky ny olombelona mpanompo sampy nonina teo (2 Pet 3: 7, 10-12; Apo 20:11). Izany no ilay batisa amin’ny afo nolazain’i Jaona fa hataon’i Jesosy amin’ny fiverenany, (Mat 3: 11).
Ny ratsy fanahy no hatao batisan'ny afo ho amin’ny fandringanana mandrakizay. Ny voaantso sy voafidy ary mahatoky kosa dia hatao batisa amin’ny Fanahy Masina.
(2 Pet 3:3) « efa fantatrareo voalohany indrindra fa amin'ny andro farany dia hisy mpaniratsira avy haniratsira, mandeha araka ny filany » (2 Pet 3:7) « fa izao lanitra sy tany ankehitriny izao dia hazonin'izany teny izany ho amin'ny afo ka tehirizina ho amin'ny andro fitsarana sy fandringanana ny ratsy fanahy. »
(2 Pet 3:10). « Fa ho avy tahaka ny mpangalatra ny andron'ny Tompo, ary amin'izany ny lanitra dia ho lasa amin'ny firimorimoana mafy, ary ho levon'ny afo ny tenan'ny zavatra rehetra, ka hodorana avokoa ny tany sy ny asa izay eo aminy. » (2 Pet 3:11) « Koa raha ho levona toy izany izao zavatra rehetra izao, dia olona tokony hanao ahoana moa ianareo amin'ny fitondran-tena masina sy ny toe-panahy araka an'Andriamanitra, »; (2 Pet 3:12) « sady manantena no mampahafaingana* ny hihavian'ny andron'Andriamanitra, izay hahamay sy hahalevona ny lanitra ary handoro sy hampiempo ny tenan'ny zavatra rehetra! [* Na: maniry mafy] ».
« Izaho dia manao batisa anareo amin'ny rano ho amin'ny fibebahana; fa Ilay avy ao aoriako no mahery noho izaho, ka tsy miendrika hitondra ny kapany aza aho; Izy no hanao batisa anareo amin'ny Fanahy Masina sy ny afo; » (Mat 3:11)
Izy no manavao ny tarehin’ny tany, araka ny teny ao amin’ny Salamo hoe: (Sal 104:30) « Maniraka ny Fanahinao Hianao, dia ary izy, ary manavao ny tarehin'ny tany Hianao. »
(2 Petera 3:15) « Ary ny fahari-pon'ny Tompontsika dia ekeo ho famonjena, tahaka ny voasoratr'i Paoly, rahalahy malalantsika, taminareo koa araka ny fahendrena nomena azy. » Ny fahari-po sy fahamoram-panahin’Andriamanitra dia fiandrasany antsika hibebaka mba tsy hahavery antsika, araka ny voasoratra hoe:
(Romana 2:4) « Sa hamavoinao ny haren'ny fahamoram-panahiny sy ny fandeferany ary ny fahari-pony, satria tsy fantatrao fa ny fahamoram-panahin'Andriamanitra dia mitaona anao hibebaka? »
(2 Petera 3:9) « Ny Tompo tsy mahela ny teny fikasany, araka izay ataon'ny sasany ho fahelany; fa mahari-po aminareo Izy, ka tsy tiany hisy ho very, fa mba ho tonga amin'ny fibebahana izy rehetra. »
(2 Petera 3:17-18) (3:17) « … tandremo fandrao ho voataonan'ny fahadisoan'ny ratsy fanahy ianareo ka ho lavo hiala amin'izay iorenanareo; » (3:18) « fa mitomboa amin'ny fahasoavana sy ny fahalalana an'i Jesosy Kristy, Tompontsika sy Mpamonjy. » Miorena amin’ny finoana marina; fantaro tsara ny fampianaran’i Jesosy Kristy, Ilay marina, ary omeo voninahitra Izy, araka ny voasoratra hoe:
(1 Jaona 2:1) « Anaka, izany zavatra izany no soratako ny aminareo mba tsy hanotanareo. Ary raha misy manota, dia manana Solovava* ao amin'ny Ray isika, dia Jesosy Kristy, Ilay Marina; [* Gr. parakleto; izahao Jao. xiv. 16] »
Ø Ary ny hany fomba ahafahantsika mahazo bebe kokoa ny Fanahin'Andriamanitra dia amin'ny alàlan'ny fankatoavana (Asa. 5:32).
(Asan'ny Apostoly 5:32) « Ary izahay dia vavolombelon'izany zavatra izany, ary ny Fanahy Masina koa, Izay efa nomen'Andriamanitra ny manaiky Azy. »
Ø Ny Pentekosta dia maneho ny fanambadiantsika ara-panahy an'i Jesosy Kristy.
Izao tontolo izao dia hiara hifaly amin'izany fampakarambady izany. Izany lanonana fampakaram-bady izany dia hihoatra lavitra ny zava-nitranga mahatalanjona tamin'ny Pentekosta taloha.
Fahiny tany Jerosalema dia olona 120 ihany no niandry ny fanomezan'Andriamanitra ny Fanahy Masina (Asan'ny Apostoly 2).
(Isaia 66: 8) « Iza akory no efa nandre zavatra toy izany? Iza no efa nahita zavatra toy izany? Hisy tany hateraka indray andro va, na firenena azo atao indray miteraka? Fa raha vao narary hiteraka Ziona, dia velon-jaza izy. »
Izany hoe ireo no voaloham-bokatry ny fanahy ho an'Andriamanitra, ovaina ho fanahy, na hateraka ho fanahy, rehefa hangonina ireo olom-boavony. (Azafady jereo ny fanazavana momba ny Fitsanganana voalohany sy ny Fanjakana arivo taona).
Nahoana no ilaina ny fanambadin’i Kristy sy ny fiangonana?· Inona moa no ilana ny fanamabadiana?
ü Vakio Gen 1:26-28;
(Genesisy 1:26) « Ary Andriamanitra nanao hoe: Andeha Isika hamorona olona tahaka ny endritsika, araka ny tarehintsika; ary aoka izy hanjaka amin'ny hazandrano ao amin'ny ranomasina sy ny voro-manidina sy ny biby fiompy sy ny tany rehetra ary ny biby rehetra izay mandady na mikisaka amin'ny tany. » (Genesisy 1:27) « Ary Andriamanitra nahary ny olona tahaka ny endriny; tahaka ny endrik'Andriamanitra no namoronany azy; lahy sy vavy no namoronany azy. » (Genesisy 1:28) « Ary Andriamanitra nitso-drano azy hoe: Maroa fara sy mihabetsaha ary mamenoa ny tany, ka mampanompoa azy; ary manjaka amin'ny hazandrano ao amin'ny ranomasina sy ny voro-manidina ary ny biby rehetra izay mihetsiketsika ambonin'ny tany. »
Adama, ilay olombelona noforonina voalohany dia natao araka ny karazan’Andriamanitra. Koa ny fianakavian’ny olombelona, izay Adama no mpikambana voalohany, no fianakavian’Andriamanitra izay hiterahany zanaka maro. Ny fiterahana eo amin’ny olombelona no “symbole” ny fiterahan’Andriamanitra: “torontoronina”, dia “am-bohoka”, dia “teraka”, dia “zaza”, dia “tanora”, dia “lehibe”, dia “antitra”.
· Ny firenena nofidin’i Jehovah, anaovany fanekena dia antsoiny hoe vadiny, ary hiteraka ireo.
ü Vakio ny Jeremia 31:31-32, manao hoe:
(Jeremia 31:31) « Indro, avy ny andro, hoy Jehovah, Izay hanaovako fanekena vaovao amin'ny taranak'Isiraely sy ny taranak'i Joda, » (Jeremia 31:32) « Nefa tsy araka ny fanekena nataoko tamin'ny razany tamin'ny andro nitantanako azy nitondra azy nivoaka avy tany amin'ny tany Egypta; Fa izy ireny dia nivadika ny fanekeko, nefa Izaho no vadiny*, hoy Jehovah.[Na: tompony] »
ü Vakio koa ny Romana 8:16-17, manao hoe: « Ny Fanahy dia miara-milaza amin'ny fanahintsika fa zanak'Andriamanitra isika. » (Romana 8:17) « Ary raha zanaka, dia mpandova; eny, sady mpandova an'Andriamanitra no mpiray lova amin'i Kristy koa, raha miara-miaritra aminy isika mba hiara-manam-boninahitra aminy koa. »
ü Ny Rom 8:29 dia milaza fa Jesosy no Lahimatoa amin’ny rahalahy maro ao amin’ny Fianakavian’Andriamanitra; hateraka ho mpikambana ao amin’io fianakaviana io amin’ny alalan’i Jesosy Kristy ireo zanak’Andriamanitra, (ateraka indray ho fanahy, Jao 3:3-8).
Ø Amin'ny fiverenan'i Kristy, ny Fiangonan'Andriamanitra, izany hoe ny Fireneny Masina, na hoe koa ny Fanjakany, dia hatao indray miteraka; ary hataony ofisialy ny Fanekena Vaovao: Indray atsangana amin’ny maty ho fanahy ireo olom-boafidy, na ovana ho fanahy ireo izay velona ka mitoetra ho mahatoky (1 Tes 4:15-17).
Hanambady an'i Jesosy Kristy ny Fiangonana (Apo 19:7) (Mat 25:1-13: Fanoharana ny amin’ny virijiny folo sy ny mpampakatra; 14-30: Fanoharana ny amin’ny talenta). Io fanambadiana io dia haharitra mandrakizay - tsy ho tapaka mihitsy izany fanekena izany! Amin'ny alàlan'ity fanambadiana ity, ny olona sisa velona eto an-tany amin'izany fotoana izany dia homena ny Fanahin'Andriamanitra. Ary izao tontolo izao dia ho afaka hitandrina ny Didy Folo, ary hahazo fanambinana lehibe noho izany fankatoavana izany. Ary ny zava-dehibe kokoa dia izao: hahita ny ohatra ataon’ny Fiangonana ny firenena rehetra – dia ny hetsika ataon’Isiraely ara-panahy.
- Ary ho takatr’izao tontolo izao fa ny fankatoavana an'Andriamanitra dia hanokatra ho azy ireo ny fahafahany miditra ao amin'ny Fanjakany.
- Amin'ny maha vadin'i Kristy antsika, dia homena fotoana isika hitondra zanaka marobe ao amin'ny Fianakavian'Andriamanitra, tahaka izay nataon’i Kristy: (Hebreo 2:10) « Fa miendrika Izay anton'ny nanaovana ny zavatra rehetra sady nahariana ny zavatra rehetra, raha mitondra zanaka maro ho any amin'ny voninahitra, ny hahatanteraka ny Tompon'ny famonjena ireo amin'ny fahoriana. »
- Ny Fiangonana, amin’ny fampakarambadin’ny Zanak’ondry (Fiverenan’i Kristy), dia hitondra zanaka marobe ho ao amin’ny Fianakavian’Andriamanitra (ireo voaloham-bokatra na olom-boavonjy, amin’ny fitsanganana voalohany).
- Izy ireo no hampianatra olona marobe mandritry ny Fanjakana Arivo Taona.
- Ireo rehetra ireo indray no hampianatra ny olona mandritry ny fitsanganana faharoa.
Aoka ho azo antoka fa mazoto isika amin'ny fiomanana hanambady an'i Jesosy Kristy. Noho ny andro Pentekosta, dia andao hamerina ny fiainantsika indray ho amin’ny fankatoavana an'Andriamanitra. Raha manao izany isika dia miantoka ny toerana hisy antsika ao amin'ny fanambadiana an’i Jesosy Kristy.
Ny fitoriana ireo fahamarinana lalina sy mahafinaritra ireo no an-isan’ny ahafantarana ny andraikitra sy famaritana ny antsoina hoe fiangonana marina.
Ny Pentekosta dia andron’ny fanekena amin’Andriamanitra. Io no andro nanaovan’Andriamanitra ny Fanekena Voalohany tamin’Isiraely tao an-Tendrombohitra Sinay, ary koa andro nanaovany ny Fanekena Vaovao tamin’ny Fiangonana nandrotsahany ny Fanahy Masina. Ao amin’ny Testamenta Taloha, ny Pentekosta dia antsoina hoe Fetin’ireo herinandro, na Fetin’ny voaloham-bokatra ; Izy dia mamaritra ny ampahany lehibe ao amin’ny Planin’Andriamanitra ho amin’ny famonjena.
Mampahatsiaro antsika ny Pentekosta, fa miasa amin’ireo voaloham-bokatry ny Fanahy Andriamanitra ankehitriny, mametraka sy mampitombo ao amin’izy ireo ny toetran’Andriamanitra sy ny maha-Izy Azy. Andriamanitra dia fitiavana, ary ny Lalàny no manoro antsika ny fomba fitiavana. Ny Fanahy Masina no fitaovana anoratany ny Lalàny ao am-pontsika sy ao amin’ny saintsika, mba ho tena iray amin’ny fianinantsika izany.
Ny Fanekena Vaovao sy ny Testamenta Vaovao
Ny atao hoe « Testamenta » dia « fanambarana entitra », matetika an-tsoratra, didy avelan’olona iray, ho fitantanana ny fanany, rehefa maty izy (didim-panana); Lazaina hoe “teny fikasana” ao amin’ny Baiboly.
(1) Inona no Testamenta navelan’i Kristy teo am-pahafatesany ? Heb 9:15-17?
(Hebreo 9:15) « Ary noho izany dia Mpanalalana amin'izay fanekena vaovao Izy, rehefa niaritra fahafatesana ho fanavotana amin'ny fahotana natao tamin'ny fanekena voalohany, mba hahazoan'izay voantso ny teny fikasana, dia ny lova mandrakizay. » (9:16) « Fa raha misy didim-pananana*, dia teny foana izany, raha tsy efa maty izay nanao azy. [* Na: fanekena] » (9:17) « Fa mafy ny didim-pananana*, rehefa tonga ny fahafatesana; fa tsy mafy akory izany, raha mbola velona ilay nanao azy. [* Na: fanekena] »
Fanamarihana: Eo amin’ny andininy faha 15, dia « Mpanalalana amin’ny Fanekena Vaovao » no ilazana an’i Kristy, fa tsy amin’ny “Fanekena”. Hamarin’izay lazain’ny andininy 16 sy 17 izany, fa tena didim-panana no navelan’i Kristy, ary ny fahafatesany no mampanan-kery izany didy izany. Fampanantenana lova mandrakizay no ambaran’io didim-panana io.
(2) Ny fampanantenana lova mandrakizay avy amin’i Kristy ve mifamatotra amin’ny fampanantenana fitahiana ho an’ny firenena rehetra eran-tany amin’ny alalan’ny taranak’i Abrahama ? Gen 22:18; Gal 3:29.
(Genesisy 22:18) « ary amin'ny taranakao no hitahiana ny firenena rehetra ambonin'ny tany, satria nanaiky ny teniko ianao. »
(Galatiana 3:29) « Fa raha an'i Kristy ianareo, dia taranak'i Abrahama sy mpandova araka ny teny fikasana. »
Izao anefa no famaritan’i Jesosy izay an’i Kristy:
(Jaona 10:27) « Ny ondriko mihaino ny feoko, ary Izaho mahalala azy, ary izy manaraka Ahy, »
(1 Jaona 2:3) « Ary izao no ahafantarantsika fa mahalala Azy isika, dia ny fitandremana ny didiny. »
(3) Ny Testamenta Vaovao ve nanomboka manan-kery tamin’ny fahafatesan’i Kristy ? Heb 9:17. (Jereo etsy aloha).
Fanamarihana: Na dia manan-kery aza ankehitriny ny Testamenta Vaovao, satria efa maty Jesosy Kristy, ny Kristiana mila mahafeno ny fepetra takin’io didim-pananana io, mba hahazoany mandova izay lazain’ny teny fikasana. Mitovy amin’izany ihany no ambaran’ny famaritan’ny Fanekena Vaovao. Tsy maintsy feno ireo fepetra ireo vao mahazo mandray ny lova, izany hoe ny « fahaterahana ao amin’ny Fianakavian’Andriamanitra ».
Iza no mpandray anjara ao amin’ny Fanekena Vaovao ?
Mihatra amin’ny Jentilisa sy ny Isiraely rehetra miaraka ny Fanekena Vaovao. Efesiana 2:11-13; Galatiana 3:27-29; Romana 9:24?
[Ny famindram-pon'Andriamanitra amin'ny jentilisa amin'ny andraisany azy ho ao amin'ny fiangonana] (Efesiana 2:11) « Koa tsarovy fa fahiny ianareo izay jentilisa araka ny nofo, ka nolazain'ny voaforan-tanana teo amin'ny nofo hoe tsy voafora - » (Efesiana 2:12) « eny, tsarovy fa tamin'izany andro izany dia tsy nanana an'i Kristy ianareo, fa olon-ko azy tamin'ny fanjakan'ny Isiraely ary vahiny tamin'ireo faneken'ny teny fikasana, dia tsy nanana fanantenana sady tsy nanana an'Andriamanitra teo amin'izao tontolo izao; » (Efesiana 2:13) « fa ankehitriny kosa, ao amin'i Kristy Jesosy, ianareo izay lavitra fahiny dia efa nampanakeken'ny ran'i Kristy. »
(Galatiana 3:27) « Fa na iza na iza ianareo no natao batisa ho an'i Kristy dia nitafy an'i Kristy. » (3:28) « Tsy misy intsony na Jiosy na Grika, na andevo na tsy andevo, na lahy sy vavy; fa iray ihany ianareo rehetra ao amin'i Kristy Jesosy. » (3:29) « Fa raha an'i Kristy ianareo, dia taranak'i Abrahama sy mpandova araka ny teny fikasana. »
(Romana 8:24) « Fa ny fanantenana no namonjena antsika; nefa ny fanantenana hita dia tsy mba fanantenana intsony; fa ahoana no mbola anantenan'ny olona izay efa hitany? »
Fanamarihana:
ü Ny Fanekena Vaovao dia tsy natao ho an’ny Isiraely irery ihany, toy ny tamin’ny Fanekena Taloha.
ü Natao ho an’izay rehetra antsoin’Andriamanitra avy amin’ny firenena rehetra ny Fanekena Vaovao.
ü Amin’izao fotoana izao anefa, dia vitsy ihany no fidina, ireo hanjaka miaraka amin’i Kristy ao amin’ny Fanjakan’Andriamanitra.
ü Ny ankabezany kosa dia ho vonjena amin’ny Milenioma (Fanjakana arivo taona) sy aorian’ny fitsanganana faharoa ; ao anatin’izany koa ny ankamaroan’ny Isiraely ara-nofo (Vakio Isaia 11:11-16; Ezekiela 37).
ü Ny Fanekena Vaovao dia ho amin’ny olombelona rehetra, satria hisokatra amin’ny fanahin’ny rehetra ny fahatakarana sy ny fanekena ny fahamarinan’Andriamanitra amin’izany fotoana izany (Hebreo 8:11-12).
(Hebreo 8:11) « Ary samy tsy hampianatra ny namany sy ny rahalahiny avy izy, na hanao hoe: Mahalalà an'i Jehovah; Fa samy hahalala Ahy avokoa izy rehetra hatramin'ny kely indrindra ka hatramin'ny lehibe indrindra; » (Hebreo 8:12) « Fa hamindra fo amin'ny tsi-fahamarinany Aho, ary tsy hotsarovako intsony ny fahotany" (Jer. 31. 31-34). »
Mbola amin’ny ho avy ny ministeran’ny Fanekena Vaovao
(1) Manondro mazava ve ny Soratra Masina fa amin’ny ho avy vao hanao fanekena vaovao amin’ny Isiraely i Kristy ? Jér 31:31; Héb 8:10?
(Jeremia 31:31) « Indro, avy ny andro, hoy Jehovah, Izay hanaovako fanekena vaovao amin'ny taranak'Isiraely sy ny taranak'i Joda, »
(Hebreo 8:10) « Fa izao no fanekena hataoko amin'ny taranak'isiraely, rehefa afaka izany andro izany, hoy Jehovah: Dia hataoko ao an-tsainy ny lalàko, sady hosoratako ao am-pony ; Ary Izaho ho Andriamaniny, ary izy ho oloko; »
(2) Voalazan’ny faminaniana koa ve fa i Kristy hanao fanekena mafy orina ho herinandro? Daniela 9:26-27?
(Daniela 9:26) « Ary rehefa afaka ny roa amby enim-polo herinandro, dia hovonoina ny Mesia* ka tsy hanana; ary ny vahoaky ny mpanjaka izay ho avy dia handrava ny tanana sy ny fitoerana masina; ary ny farany dia hisy safotra, ary hatramin'ny farany dia hisy ady sy fandravana voatendry.[Na: ilay voahosotra] » (Daniela 9:27) « Ary hanorina fanekena ho herinandro amin'ny maro izy ary hampitsahatra ny fanatitra alatsa-drà sy ny fanatitra hafa hatramin'ny antsasaky ny herinandro, ary amin'ny elatry* ny fahavetavetana no nihavian'ny mpandrava, hatramin'ny fahafonganana voatendry, izay haidina amin'ny mpandrava**. [*Na: eo an-tampon'][**Na: ny efa lao] »
Fanamarihana: Ny andininy faha 27 milaza koa fa hampitsahatra ny fananitra eo amin’ny « antsasaky ny herinandro » Izy (amin’ny heviny marina). Araka ny tantara dia voaporofo fa 3 ½ taona ny faharetan’ny ministeran’i Jesosy Kristy teto an-tany, ary nohomboana tamin’ny hazofijalina Izy tamin’ny taona 31 amin’izao fanisanandrontsika izao, teo amin’ny antsasaky ny herinandro (alarobia), ary tamin’ny antsasaky ny herinandro ara-paminaniana maharitra fito taona. Amin’ny fiverenany, hohamafisiny indray io fanekena mandritry ny 3 ½ taona hafa io, izay hameno ilay herinandro ara-paminaniana. Eto ny andro iray dia midika ho taona iray ara-paminaniana (Nomery 14:34; Ezekiela 4:3-6). Manaraka izany, dia ho tanteraka ny Jeremia 31:31 manao hoe: « Indro, avy ny andro, hoy Jehovah, Izay hanaovako fanekena vaovao amin'ny taranak'Isiraely sy ny taranak'i Joda ». Io fanekena io dia hahasahana ny olona rehetra avy amin’ny firenena rehetra, manomboka amin’ireo izay efa voantson’Andriamanitra ho ao amin’ny Fanjakany.
Kristy afaka hanambady indray
(1) Ny fanambadian’i Jehovah tamin’Isiraely taloha ve rava noho ny fijangajangan’Isiraely? Jeremia 3:20.
(Jeremia 3:20) « Kanefa toy ny vehivavy misintaka miala amin'ny lahy, dia toy izany tokoa no nisintahanareo niala tamiko, ry taranak'Isiraely, hoy Jehovah. »
(2) Jehovah ve, Izay lasa Jesosy taty aoriana, voatery nisao-bady noho ny fijangajangan’Isiraely ? Jeremia 3:8; Isaia 50:1.
[Ny amin'ny nisaorana ny Isiraely, sy ny amin'ny Mpanompon'i Jehovah]
(Isaia 50:1) « Izao no lazain'i Jehovah: Aiza izay taratasy fisaoram-bady nisaorako an-dreninareo? Ary iza amin'izay manan-trosa amiko no nivarotako anareo? Tsia, fa noho ny helokareo ihany no nivarotana anareo, ary noho ny fahadisoanareo ihany no nisaorana an-dreninareo. »
(Jeremia 3:8) « Ary hitako fa na dia efa nisaorako aza Isiraely mpiodina ka nomeko taratasy fisaorana noho ny fijangajangana, dia tsy nety natahotra Joda mpivadika rahavaviny na dia izany aza, fa nandeha nijangajanga koa izy. »
Fanamarihana: Nijangajanga ara-panahy Isiraely tamin’ny nanarahany ny fomban’ireo firenena nanodidina azy. Nanompo andriamani-kafa izy, ary nanao ny fomban’ny mpanompo sapy, fa tsy nanao izay nandidian’i Jehovah azy.
(3) Ny fisaorana an’Isiraely ve no nitarika fanafoanana ny fanambadiana, sa antony hafa no nahatonga izany ? 1 Korintiana 7:39; Romana 7:2?
(1 Korintiana 7:39) « Ny vavy voafehin'ny lalàna, raha mbola velona ny lahy; fa raha maty kosa ny lahy, dia afaka hanam-bady izay tiany izy, nefa ao amin'ny Tompo ihany. »
(Romana 7:2) « Fa ny vehivavy izay manambady dia fehezin'ny lalàna ho an'ny lahy, raha mbola velona ny lahy; fa raha maty kosa ny lahy, dia afaka amin'ny lalàn'ny lahy izy. »
Fanamarihana: Tahaka ny fahafoanan’ny fanekem-panambadiana raha maty ny lahy na ny vavy, ny fahafatesan’i Kristy dia nanafaka Azy tamin’ny fanekem-panambadiana tamin’Isiraely. Izany fahafatesany izany no namela ny fanorenana ilay didim-pananana « lova mandrakiza » ho an’ireo izay hatsoin’Andriamanitra.
(4) Ny fampakaram-badin’i Kristy (Ilay Zanak’ondrin’ Andriamanitra), dia hohamasinina raha vao miverina eto an-tany Izy, Apokalypsy 19:7-9.
(Apokalypsy 19:7) « Aoka isika hifaly sy ho ravoravo ka hanome voninahitra Azy; fa tonga ny fampakaram-badin'ny Zanak'ondry. Ka efa niomana ny vadiny. » (19:8) « Ary nasaina nitafy rongony fotsy madinika sady madio no mangatsakatsaka izy; fa izany rongony fotsy madinika izany dia ny asa marina ataon'ny olona masina. » (19:9) « Ary hoy koa izy tamiko Soraty: Sambatra izay nantsoina ho amin'ny fanasana fampakaram-badin'ny Zanak'ondry. Fa hoy izy tamiko: Ireo dia teny marin'Andriamanitra. »
Ny Fanekena Taloha sy ny Fanekena Vaovao Samy Mifototra Amin’ny Lalàn’Andriamanitra
(1) Inona no tsy maintsy ianarantsika tamin’izay nataon’ Isiraely fahiny ? 1 Korintiana 10 :6, 11.
(1 Korintiana 10:6) « Ary izany zavatra izany dia tonga anatra ho antsika, mba tsy ho mpila zava-dratsy isika toy ny nilan'ireny. »
(1 Korintiana 10:11) « Ary izany dia nanjo azy mba ho anatra, sady voasoratra izany ho fananarana antsika izay niharan'ny faran'izao tontolo izao. »
Fanamarihana: Tsy lavorary ny asa sy fikasana ataon’ny olombelona raha tsy mifanaraka amin’ny Didy Folo sy ny Lalàn’Andriamanitra rehetra. Nefa izay rehetra nataon’Isiraely taloha dia nampiseho fa tsy mahay mitandrina ny Lalàn’Andriamanitra amin’ny heriny sy fahaizany na fahendreny irery ny olombelona.
(2). Moa ve Kristy tonga hanamafy kokoa ny Lalàny? Isaia 42:21.
(Isaia 42:21) « Sitrak'i Jehovah noho ny fahamarinany ny hahalehibe ny lalàna sy ny hahabe voninahitra azy. »
Fanamarihana: Nampiakarin’i Kristy ny fepetra, mba hitandremana ny Lalàna ara-panahy ihany koa, araka ny tanjona ara-panahy tratrariny. Nataon’i Kristy izay hamatoran’ny lalàna ny olonambelona hitandrina izany araka ny hevitra sy tanjona ara-panahy nanaovana azy: Matio 5 :27-28.
(Matio 5:27) « Efa, renareo fa voalaza hoe: Aza mijangajanga (Eks. 20. 14). » (Matio 5:28) « Fa Izaho kosa milaza aminareo fa izay rehetra mijery vehivavy hila azy dia efa nijangajanga taminy tam-pony sahady. »
(3). Moa ve Kristy manamafy fa azo tandremana ny Lalàna? Matio 5:17.
(Matio 5:17) « Aza ataonareo fa tonga Aho handrava ny lalàna na ny mpaminany; tsy tonga Aho handrava, fa hanatanteraka. »
Fanamarihana: Ny Didy folon’Andriamanitra dia efa nana-kery talohan’ny namoronana ny olombelona. Hamafisin’i Kristy mazava tsara fa tsy tonga handrava ny lalàna Izy fa hanatanteraka, sy hitandrina azy. Tamin’ny fanaovany an’izany dia nampiseho Izy fa amin’ny herin’ny Fanahy Masina dia azo ankatoavina ny Lalàna. Fantatr’Andriamanitra fa betsaka tsy misy fetra ny Fanahy anan’i Krisy, fa ny antsika kosa kely ihany ; nefa manantena Izy fa afaka mitombo araka ny fotoana sy ny traikefa vita isika.
(4). Moa ve ny Kristiana tokony hiezaka manatratra ny fepetra napetrak’i Kristy? 1 Jaona 2:4-6.
(1 Jaona 2:4) « Izay manao hoe: Fantatro Izy, nefa tsy mitandrina ny didiny, dia mpandainga, ary ny marina tsy ao anatiny. » (1 Jaona 2:5) « Fa na iza na iza mitandrina ny teniny, dia tanteraka ao aminy marina tokoa ny fitiavana an'Andriamanitra*; izany no ahafantarantsika fa ao aminy isika. [* Na: ny fitiavan'Andriamanitra] » (1 Jaona 2:6) « Izay* milaza fa mitoetra ao aminy izy, dia tsy maintsy mandeha toy izay nandehanany koa. [* Na: Izao no ahafantarantsika fa ao aminy isika: Izay ....] »
Fanamarihana: Na dia antsoin’Andriamanitra hitombo sy handresy aza ny tsirairay amintsika, dia ny Fanahy Masina no miteraka ny fiovana izay tokony hiseho amin’ny fiainantsika, alohan’ny hahavonona antsika hatsangana amin’ny maty ho fanahy. Amin’izay fotoana izay vao tena mpikambana amin’ny Fanekena Vaovao miaraka amin’i Kristy isika.
Amin’ny lesona hafa isika no hianatra momba ny Fanahy Masina sy ny fepetra hahazoana azy, ny finoana an’i Kristy ary ny fanaovana batisa.
Ny fibebahana dia manambara fanenenana noho ny fandikana ny lalàn’Andriamanitra, ary koa faniriana lehibe hiova fo, sy hanoa ny lalàn’Andriamanitra, ary hiaina mifanaraka amin’izany manomboka eto. Rehefa izany, dia tsy maintsy mino fa ny ran’i Kristy no manadio antsika amin’ny fahotana tany aloha, ary i Kristy mametraka ny Fanahiny Masina ao anatintsika araka ny teni-fikasany. Farany, ny batisa dia manambara ny fandevenana ny momba antsika taloha feno ota ao anaty fasana rano, sy ny fitsanganana avy ao ho amin’ny fiainam-baovao vonon-kiady sy handresy, miaraka amin’ny Fanahy Masina izay omena antsika amin’ny fametrahan-tanana aorian’ny batisa.
Miomana hanambady an'i Kristy
Genesisy 22: 15-19 - Lioka 1:76-80
Nasain'Andriamanitra natolotra ho Sorona ho Azy ny zanaka lahitokan'i Abrahama. (Genesisy 22:1-15). Nankatò tanteraka ny Tenin’Andriamanitra i Abrahama. Tena nitoky an'i Jehovah ny fon'i Abrahama. Nozahan'Andriamanitra toetra izy. Nomen'Andriamanitra teny fikasana izy rehefa nankatò an'i Jehovah, dia fitahiana sy taranaka maro, amin’ny alalan’io zanany tokana izay foiny homena an'Andriamanitra io. (and 17) Tsy novonoina araka izay nangatahan'Andriamanitra ilay zanany, fa nomeny ondrilahy izy hatao fanatitra. Ary avy eo dia nody tany aminy izy ireo.
Isika kosa dia ampanantenain'Andriamanitra handova fiainana mandrakizay. Ny fiomanana dia ny fiomanana hanambady an'i Kristy, ary ny fankatoavantsika an'Andriamanitra no miantoka izay fitahiambe sy fandresena ny fahavalo (and 17-18) avy amin'i Jehovah izay.
Ny Zanak’Isiraely dia nandeha tany maina rehefa niampita Ranomasina Mena, fa ny Egyptiana fahavalony kosa ringana tao.
Jesosy Kristy no ilay taranak' i Abrahama hitahiana sy hamonjena ny firenena rehetra ambonin'ny tany, satria amin’ny alalan’ny finoana sy fankatoavana ny didin’Andriamanitra no hahazoana izany.
Lioka 1:76-80
Faminaniana nomen'Andriamanitra an'i Zakaria, taranak’i Davida, momba an’i Jaona zanany no voalaza eto. Feno ny Fanahy Masina izy ary namimany. Andriamanitra nanao fanavotana ho an'ny Isiraely.
Lazaina fa tandrom-pamonjena i Jaona, ary efa voalazan’ny faminaniana fahiny koa fa hisy Mpamonjy hirahin'Andriamanitra hamonjy ny olony, hanafaka antsika amin’ny fahavalo.
Tandroka = mpanjaka, hevitra ara-panahy.
Famonjena amin’ny fahavalo no famonjena entiny, mety ho amin’ny fahavalo ara-bakiteny io, na ara-panahy (devoly sy Satana).
Inona no fanekena masina voalaza eto? Inona no fianianana na fanekena masina nataon'i Jehovah tamin'i Abrahama?
Genesisy 22:15-19
Hanana anjara amin’ny fanomanana ny fiaviana ny famonjena nataon'i Jehovah izany io zanaka haterak'i Zakaria io.
Hanompo an'Andriamanitra amin’ny fahamasinana sy fahamarinana ary tsy amin-tahotra ny olony noho sitrapon’Andriamanitra.
I Jaona no voalaza fa hialoha an'i Jesosy Kristy Tompo, ary hamboatra ny lalany. (and 76)
Fahalalam-pamonjena = famelan-keloka (and 77)
Ny famindram-pon'Andriamanitra no nanomezany an'i Jaona mamboatra ny lalàn'i Jehovah, lalàn'i Jesosy Kristy.
Manome hazavana ny olona mipetraka ao amin'ny maizina i Jaona, na hampianatra ny olona hibebaka, ary rehefa maheno ny fahazavana entin'i Jaona ireo, dia ho afaka amin'ny aizina sy ny aloky ny fahafatesana (ozona,fahaverezana), ka handeha amin’ny lalana mahitsy (araka ny didin’Andriamanitra sy ny lalàny rehetra) ho amin’ny lalam-piadanana.
Miantso ny olona hibebaka marina i Jaona, ary maro no nanatona azy hataony batisa. Ireo olona miala amin’ny fahotana sy miezaka mitandrina ny didy sy fitsipik'Andriamanitra no hateraka amin’ny fahateraham-baovao, hateraka ho fanahy, aey hiomana hanambady an'i Kristy.
FIREHETAN’NY FO HO AN'NY FAHAMARINANA, IZANY NO DIANTSIKA AMIN’NY PENTEKOSTA
(Pasteur Monte KNUDSON, May 2021)
Taloha, 3465 taona lasa izay, dia nisy firenena iray tao anatin'ny firenena iray. Misy olona 2 ka hatramin'ny 3 tapitrisa ao amin'ity firenena ity ary babo sy nofehezin'ny mpitondra matanjaka be izy ireo. Ireo olona 2 ka hatramin'ny 3 tapitrisa ireo dia andevony.
Andriamanitra manome antsipiriany lehibe ao amin’ny Soratra Masina momba ny fisehoan-javatra nihatra tamin’ny Isiraely nivoaka avy tany Egypta.
Raha vao nankalaza ny Paska sy ny Andro Fihinana Mofo Tsy Misy Masirasira isika dia nohazavaina tamintsika ny antony.
Nanana toetra vaovao ny Isiraely tamin’izany andro izany. Zava-dehibe ho antsika ny mahatakatra an’izany; Isiraely tsy nikasa ny hivoaka irery avy tany Egypta, fa nanafaka azy ireo hiala an’i Egypta Andriamanitra, na dia tsy naniry ny handao an'i Egypta aza izy ireo.
Fantaro fa niala tany Egypta tamin'ny alina ny Isiraely, notarihin’Andriamanitra tamin'ny hazavana.
Nandao ny tranony izy ireo, sy ny kolontsainy izay nifangaro tamin'ny kolontsaina Egyptiana.
Nifindra tany amin'ny faritany tsy fantatra izy ireo, nefa nanome fahagagana maro Andriamanitra mandritra ny androm-piainany.
Taloha dia tao anaty haizina izy ireo, fa ankehitriny kosa mandeha amin'ny fahazavan'Andriamanitra.
Nomena toetra vaovao izy ireo, handeha amin'ny lalana hafa, dia mankany amin'ny tany vaovao izay efa nomen'Andriamanitra ho azy ireo, nantsoina hoe “Tany Nampanantenaina”.
Talohan'ny nanombohan'izy ireo an'ity dia ity, dia faly izy ireo, ny kapa teo amin'ny tongony, ny tehina teny an-tànany.
Nilazana izy ireo mba hiambina ary hijery ny fahafatesan'ny lahimatoan’i Egypta tamin'ny misasakalina, handrenesany ny fitarainan'ny Egyptiana ... ary hahatsapany ho feno herim-po amin'ity fifandraisana vaovao natolotr'Andriamanitra azy ireo ity.
Nahazo alalana hangataka tamin’ny Egyptiana izay notadiaviny izy ireo, ary handao azy ireo amin'ny tànana avo.
Tena nahaliana tokoa izany rehetra izany!
Na dia nampientam-po toy izany aza ny dia, nisy ny olana.
Nihetsika foana ny Israely. Tsy zatra ireo faritany noteteziny izy ireo. Tsy mbola teo izy ireo talohan'izao. Hafa noho ny taloha ny zava-drehetra. Sarotra ny tany indraindray. Ary mila miantehitra amin'Andriamanitra izy ireo.
Inona araka ny eritreritrao no sakana lehibe indrindra teo amin'ny Isiraely?
Tsy hevitr'izy ireo izany!
Nasaina nandao an'i Egypta izy ireo! (Egypta dia tandindon'ny ota; ary Farao, tandindon'i Satana, dia tsy nitaky ny handaozan'ny Isiraely an'i Egypta). Nolazain'Andriamanitra tamin'ny Isiraely ny fotoana sy ny lalan-kalehany ...
Nefa tsy nientam-po handao an'i Egypta izy ireo, sy hanao izay nangatahin’Andriamanitra (Eksodosy 14: 11); Ary hoy izy tamin'i Mosesy: Satria tsy nisy fasana tany Egypta, dia nentinao ho faty atỳ an-efitra va izahay? Nahoana no nanao toy izany taminay ianao ka nitondra anay niakatra avy tany Egypta?
Moa ve ny fiantsoana antsika hevitsika: miala ny fomba fiainantsika ary manao zavatra vahiny tanteraka, ary avy eo manana fientanam-po hanao izany?
Lohateny: Firehetam-po ho an'ny Fahamarinana, Izany no Diantsika.
Fanontaniana: Be fitiavana ny fahamarinana araka an'Andriamanitra ve isika amin'ny fiainantsika? Inona no dikan'ny hoe mazoto amin'ny fahamarinana?
Raha nasaina nametaka famantarana teo am-baravarana toy izao isika: “Ity faritra ity dia natao ho an'ny mpanota maniry hibebaka.”
Ahoana ny hevitsika? Nisoratra anarana tamin'izany ve isika? Nanana firehetampo hanao izany?
Hoy Jesosy: (Lioka 9:62) « Fa hoy Jesosy taminy: Tsy misy olona mitana fangady tarihina ary miherika ka miendrika ho ao amin'ny Fanjakan'Andriamanitra. » Noho izany, rehefa nantsoina isika dia tsy maintsy manana firehetam-po tsy hiverina any amin'izao tontolo izao.
Ary miaraka amin'izay, dia manana fahatakarana ara-panahy sy fitomboana ara-panahy isika, izay tsy ho hitantsika na ho nanantsika mihitsy. Koa dia mampientanentana mihitsy izany.
Andro Firavoravoan'ny Pentekosta izao: manana Andro Masina fanao isan-taona ankalazaintsika isika. Hazavao.
Ny Fanahy Masina dia fanahin'Andriamanitra. Manampy antsika hahalala ny zavatra momba an'Andriamanitra izany. Andriamanitra dia mitady vokatra.
Ny Fetin'ny Pentekosta dia fanomezana ny Fanahy Masin’Andriamanitra.Rehefa manokatra ny saintsika amin'ny fahalalana Azy Andriamanitra, moa ve isika mahita ny fomba fiainan'Andriamanitra hoe tsara sa ratsy?
Ahoana no fandraisantsika azy rehefa mandika ny lalàn'Andriamanitra isika?• Inona no tsapantsika rehefa manao ratsy amin'ny hafa isika? Maniry mafy ny hiova ve isika?
• Miahiahy ve isika rehefa mandratra ny hafa? Maniry mafy ny hiova ve isika?• Mitsiriritra izay ananan'olon-kafa ve isika? Mialona ny hafa ve isika?• Mitsiriritra zavatra izay tsy tokony hohajaintsika ve isika?• Mikatsaka bebe kokoa ho an'ny tenantsika ve isika ary tsy miraharaha ny hafa?• Manamarina ny fahotantsika ve isika, sa maniry fatratra ny handresy izany?• Te hitandrina sy hianatra bebe kokoa momba ny Sabata sy ny Andro Masina ve isika?
• Te hitandrina ny didy 10 ve isika ka hitombo ao aminy?• Tiantsika ve ny mitia ny hafa, na dia fahavalontsika aza izy ireo?• Te hifantoka amin'ny tombontsoantsika manokana toa ny an'ny hafa ve isika?Ireo rehetra ireo dia zava-tsarotra sy manahirana avokoa, mainka ve ianao hirehitra amin'izany.
Inona no mahaliana antsika amin'ny fiainantsika ara-batana? Betsaka ny zavatra mahaliana antsika ary sarotra koa izany. Mandray lesona mozika, miavaka amin'ny fanatanjahantena, fialamboly, fifandraisana. Ahoana no fahaizantsika miavaka amin'ireo? Mila manana fitiavana isika…
Moa ve isika maniry fatratra ny hanaisotra ny ota rehetra amin'ny fiainantsika ka hanolo izany amin'ny asa marina?
Mihevitra ve isika fa liana amin'izany ho antsika i Jesosy Kristy?
Izao no voalazan’ny tenin’Andriamanitra: (Titosy 2:14) « Izay nanolotra ny tenany hamonjy antsika, mba hanavotany antsika ho afaka amin'ny ota rehetra, sy hanadiovany izay olona ho an'ny tenany, sady ho mazoto indrindra amin'ny asa tsara izany. »
(1 Korintiana 14:12) « Ary toy izany ihany koa ianareo: raha fatra-paniry ny zava-panahy, dia izay hampandroso ny fiangonana* no tadiavo indrindra. [* Gr. eklesia] »
Ny asa tsara dia asa marina ataon'ny olo-masina. Mafana fo amin’izany ny olony… Mampandroso ny fiangonanana izany.
Ny Apok 19: 7 dia mampiseho fa tanteraka ny zotom-pon'i Jesosy Kristy:"Andeha isika hifaly sy hiravoravo ka hanome voninahitra Azy; fa tonga ny fampakaram-badin'ny Zanak'ondry, ary efa niomana ny vadiny." Ny sasany mafana fo, toa an'i Kristy ihany.
(Apokalypsy 19:8) « Ary nasaina nitafy rongony fotsy madinika sady madio no mangatsakatsaka izy; fa izany rongony fotsy madinika izany dia ny asa marina ataon'ny olona masina. »
Nanaraka io fomba fiaina io izy ireo.(Apokalypsy 19:9) « Ary hoy koa izy tamiko Soraty: Sambatra izay nantsoina ho amin'ny fanasana fampakaram-badin'ny Zanak'ondry. Fa hoy izy tamiko: Ireo dia teny marin'Andriamanitra. »
Mahita ny fiantsoana azy ireo ary maniry mafy an'io izy ireo.Andrasan'Andriamanitra izany!Andeha hojerentsika ny fientanam-pon’i Jesosy Kristy hanao izany ho antsika,
(Hebreo 12:3) « Fa hevero tsara Ilay naharitra ny fanoherana nataon'ny mpanota taminy*, fandrao ho ketraka ianareo, ka ho reraka ny fanahinareo. [* Na: ireo mpanota manimba tena] »
Lazaina amintsika ny hahatadidy izay nolalovan'i Kristy fandrao ho reraka sy ho kivy isika. (Hebreo 12:4) « Hianareo tsy mbola nanohitra niady tamin'ny ota hatramin'ny fahalatsahan-drà. » Nanao izany rehetra izany Jesosy. Ahoana ny amintsika?
Eny, tolona ny fandresena ny ota; Nefa raha miala amin'izany lalana izany isika, dia milaza fa te-hanary ny lalan'Andriamanitra, tsy mila fifandraisana misy fiadanana isika, ary te handositra ny fitahian'Andriamanitra rehetra.
Hoy Izy:
(Eksodosy 19:4) « Hianareo efa nahita izay nataoko tamin'ny Egyptiana sy izay nitondrako anareo tamin'ny elatry ny voromahery ary ny nampankanesako anareo ho aty amiko. » (19:5) « Koa ankehitriny, raha hihaino ny feoko tokoa ianareo ka hitandrina ny fanekeko, dia ho rakitra soa ho Ahy mihoatra noho ny firenena rehetra ianareo; fa Ahy ny tany rehetra. » (19:6) « Dia ho fanjaka-mpisorona sy ho firenena masina ho Ahy ianareo. Ireo teny ireo no holazainao amin'ny Zanak'Isiraely. »
Dia toy izao koa:
(Apokalypsy 5:10) « Ary efa nataonao fanjakana sy mpisorona ho an'Andriamanitsika ireo; Ary manjaka ambonin'ny tany izy. »
Tsy izany no lalana tiantsika hofidina. Nahoana? Satria tsy hevitra avy amintsika izany. Ny Isaia 58:5 manao hoe: (Isaia 55:8) « Fa ny fihevitro tsy fihevitrareo ary ny lalanareo kosa tsy mba lalako, hoy Jehovah. »
(Isaia 55:9) « Fa tahaka ny hahavon'ny lanitra noho ny tany no hahavon'ny lalako noho ny lalanareo sy ny fihevitro noho ny fihevitrareo. »
Ny lalantsika anefa dia tokony ho momba ny raharahan'ny Raintsika, manadio ny tranony. Jesosy Kristy dia liana amin'izany. ahoana ny amintsika?
(Jaona 2:13) « Ary efa akaiky ny Pasky ny Jiosy, ka dia niakatra tany Jerosalema Jesosy. » (Jaona 2:14) « Ary hitany teo an-kianjan'ny tempoly ny nivarotra omby sy ondry sy voromailala ary ny mpanakalo vola izay nipetraka teo; »
Tonga ao an-tranon'Andriamanitra i Jesosy Kristy (tempolin'Andriamanitra isika). Noho izany, asehony fa manana ota ao amintsika isika, ary mila manala izany. Manana fientanam-po amin'ny faniriana hahita ny ota ao amintsika ve isika?
Tadidio fa tokony hanao asa marina isika, saingy hita fa manao zavatra tsy mifanaraka amin’izany. Manao raharaham-barotra ao amin'ny tempoly isika, manompo ny tenantsika.
(Jaona 2:15) « dia nanao kotopia kofehy Izy ka nandroaka azy rehetra hiala teo an-kianjan'ny tempoly, na ny ondry na ny omby, ary nararany ny volan'ny mpanakalo vola, sady nazerany ny latabatra; »
Jesosy Kristy dia maniry fatratra ny hampiseho amintsika ny fahotantsika.
(Jaona 2:16) « dia hoy Izy tamin'ny nivarotra ny voromailala: Ento mivoaka ireto zavatra ireto; aza atao trano fivarotana ny tranon'ny Raiko. »
Nitady tombony ho an'ny tenany izy ireo fa tsy nanompo vahoaka.(Jaona 2:17) « Ary ny mpianany nahatsiaro fa voasoratra hoe: Ny firehetako ny amin'ny tranonao no haharitra aina ahy (Sal. 69. 9). »
Raha mahitsy amin'ny tenantsika fotsiny isika dia olona tia tena.
Vakio ny Asan'ny Apostoly 2: 27-39; Tokony hanana filan'ny fahamarinana isika.
Ohatra --- Ny mari-pana ao amin'ny efitrano anio. Mahazo aina ve isika? Mieritreritra ny hafa ve isika raha mahazo aina izy, alohan'ny hanovantsika ny thermostat?
Ohatra --- Nahoana isika no mifanolana eo amin'ny fifandraisantsika amin'ny hafa? Manondro ny hafa amin'ny rantsan-tànana ve isika sa mijery ao anatintsika koa? Tia tena ve isika? Jakoba 4: 1-10
Ohatra --- Tetikasa fananganana sy ny mpanao trano dia mieritreritra ny tenany ihany. Ny mpifanila vodirindrina hafa mahita azy ireo ho manafintohina.
Andao isika hivadika amin'ny 1 Tim 3:15 hahafantarana ny firehetampo mety hatao momba ny fiangonan’Andriamanitra velona, dia ny tenantsika.
(1 Timoty 3:15) « fa raha tratra ela aho, dia ny hahafantaranao izay fitondran-tena mety hatao ao an-tranon'Andriamanitra, dia ny fiangonan*'Andriamanitra velona, sady andry sy fiorenan'ny fahamarinana. [* Gr. eklesia] »
Ao anaty sambo ve isika amin'ity dia ity? Vonona ny handresy ireo sakantsakana rehetra manelingelina sy hanaraka ny Kapitenin'ny famonjena antsika ve isika?
Hitantsika ao amin'ny Hebreo ny fomba anatanterahan'Andriamanitra izany ho antsika.
Heb.12: 5-7 (Hebreo 12:5) « Ary hadinonareo ny fananarana izay milaza aminareo toy ny amin'ny zanaka hoe: "Anaka, aza atao ho zavatra kely ny famaizana ataon'i Jehovah, ary aza reraka, raha resi-lahatry ny anatra ataony ianao; » (Hebreo 12:6) « Fa izay tian'i Jehovah no faizany, ary izay zanaka rehetra raisiny no kapohiny" (Oha. 3.11,12). » (Hebreo 12:7) « Famaizana no anton'ny iaretanareo; Andriamanitra mitondra anareo tahaka ny zanaka; fa aiza moa izay zanaka tsy faizan-drainy? »
Ary kapohina ny zanaka rehetra raisiny.(Hebreo 12:11) « Fa ny famaizana rehetra dia tsy mba atao ho mahafaly andro anaovana, fa mampahory; fa rehefa afaka izany, dia vao mitondra ny vokatry ny fahamarinana hiadanana ho an'izay nanaovana azy izy. »
Ireo izay mikatsaka ny fahamarinana dia mahatakatra izany. Manana fitiavana ny hitovy amin'i Kristy izy ireo.
(Apokalypsy 3:16) « Fa satria matimaty ianao ka tsy mafana na mangatsiaka, dia efa haloan'ny vavako ianao; »
Ilazana isika mba tsy hanao tsinontsinona ny herin'Andriamanitra miasa ao amintsika. 1 Tim. 4:14.
(1 Timoty 4:14) « Aza tsy mitandrina ny fanomezam-pahasoavana izay ao anatinao, izay nomena anao tamin'ny faminaniana sy ny fametrahan-tànan'ny loholona*. [* Gr. presbytera] »
Moa ve manaraka ny fisainan'Andriamanitra isika? sa sarotra loatra amintsika izany? Andao hojerena ny lafy tsara amin'ny fanantenana hanampy antsika.
Nanitsy ireo rahalahy tany Korinto i Paoly tamin'ny diany nankany amin'ny Fanjakan’Andriamanitra, ary afaka mampihatra izany fanitsiana izany amin'ny fiainantsika isika; miaiky ny fahotantsika amin'ny fikatsahana ny fahazotoana ho amin'ny fahamarinana, 2 Kor 7:11 Fa fantaro izao zavatra izao, fa nalahelo isika (mamaly ny famonjen'Andriamanitra antsika isika raha amin’izao dia izao: hitantsika ny fahotantsika ary te-hiova isika).
(2 Korintiana 7:11) « Fa, indro, izany nampalahelovana araka an'Andriamanitra izany indrindra dia nahatonga fahazotoana manao ahoana teo aminareo! eny, fialan-tsiny manao ahoana! fahatezerana manao ahoana! fahatahorana manao ahoana! faniriana manao ahoana! zotom-po manao ahoana! famaliana ny ratsy natao manao ahoana! Tamin'izany rehetra izany dia nampiseho ny fahadiovanareo ny amin'izany raharaha izany ianareo. »
· amin'ny fomba araka an'Andriamanitra: Inona ny fahazotoana novokariny tamintsika, (mandroso isika, te-hiova, mikely aina amin'izany)
· inona ny fanadiova-tena, (miala tsiny am-bava (famelana), amin'ny hafa sy amin'Andriamanitra isika); fahatezerana inona, (mankahala ny ota isika ary amin'ny hafa koa. Manahy isika).
· inona ny tahotra, (matahotra ny vokatry ny ota isika)
· inona no faniriana mafy, (liana amin'ny fanovana izahay)
· inona ny zotom-po, (faly isika amin'ity dia ity)
· inona no fanamarinana! (Misaotra isika noho ny fahazoana ny sain'i Kristy)
Tamin'ny zavatra rehetra dia nasehonao mazava tsara tamin'ity raharaha ity (manana fahatakarana mazava isika ary fantatsika fa eo amin'ny làlana tsara isika)
(1 Jaona 3:3) « Ary izay rehetra manana izany fanantenana miorina aminy izany dia manadio ny tenany mba hadio tahaka Azy. »
Andriamanitra dia momba ny lafy tsara rehetra ary ny Fetin'ny Pentekosta dia manampy antsika hampihatra fientanam-po hametraka ny fahamarinana eo amin'ny fiainantsika. Manantena aho fa ity no làlana irintsika rehetra haleha, satria fitiavan'ny Jesosy Kristy antsika. Manantena izy ireo fa ho anisan'ny amin'ny Fijinjana izy ireo.
Tian'Andriamanitra hamita ity dia ity isika.Nomeny kapiteny ho famonjena antsika isika hanampiana antsika hamita azy. Mal.3: 16-17 dia manampy antsika hahita ny tempolintsika amin'ny fanadiovana azy io, miaraka amin'ny fahamarinana izay itarihan'i Jesosy Kristy antsika.
(Malakia 3:16) « Ary tamin'izany izay natahotra an'i Jehovah dia samy niresaka tamin'ny namany avy; ary Jehovah nihaino ka nandre izany; ary nisy boky nosoratana teo anatrehany ho fahatsiarovana izay matahotra an'i Jehovah sy mihevitra ny anarany. » (Malakia 3:17) « Ary ho rakitra soa ho Ahy ireny amin'ny andro izay hotendreko, hoy Jehovah, Tompon'ny maro, ary ho antra azy Aho toy ny olona antra ny zananilahy izay manompo azy. »
Ny zotom-po ho amin'ny fahamarinana no irian'Andriamanitra ho antsika. Eny, ny fanamby dia ity fa ny valisoa dia lehibe noho ny zava-tsarotra.
Famaranana:
Ry rahalahy, eo amin'ny dia mankany amin'ny Fanjakan’Andriamanitra isika. Rehefa mivoatra amin'ny zava-tsarotra isika dia afaka mangataka fanampiana amin'Andriamanitra ary ho vonona amin'ny zava-bitan'ny fivoarana eo amin'ny fiainantsika. Andao hazoto amin'ny fahamarinana, raha mbola manohy izany isika, dia afaka mahazo antoka ny amin'ny valiny amin'ny tanjon'ny diantsika.
(Hebreo 10:32) « Fa tsarovy ny andro fahiny izay naharetanareo ny ady mafy tamin'ny fahoriana, rehefa nohazavaina ianareo; » (Hebreo 10:33) « indraindray raha natao ho fizaha noho ny fanaratsiana sy ny fampahoriana ianareo, ary indraindray koa raha tonga naman'izay azon'izany. » (Hebreo 10:34) « Fa sady niara-niaritra tamin'izay nifatotra ianareo no nifaly raha norobaina ny fanananareo, satria fantatrareo fa ianareo dia manana fananana tsara lavitra sady maharitra*. [* Na: fa ianareo dia manana ny tenanareo ho fananana tsara lavitra sady maharitra] » (Hebreo 10:35) « Koa aza manary ny fahasahianareo izay misy valiny lehibe. » (Hebreo 10:36) « Fa tokony hanana faharetana ianareo raha hahazoanareo izay lazain'ny teny fikasana, rehefa vitanareo ny sitrapon'Andriamanitra. » (Hebreo 10:37) « Fa "rehefa afaka kelikely, dia ho tonga Ilay ho avy, fa tsy hitaredretra" » (Hebreo 10:38) « Ary "ny oloko marina* dia ho velon'ny finoana;" fa raha mihemotra izy, dia tsy sitraky ny fanahiko (Hab. 2.3, 4). [* (ny marina)] » (Hebreo 10:39) « Fa isika tsy mba naman'izay mihemotra ho amin'ny fahaverezana, fa naman'izay mino ho amin'ny famonjena ny fanahy. »
Aza mihemotra isika fa raha mazoto amin'ny fahamarinana dia homen'Andriamanitra antsika ny fanampiana hahatratrarana azy ireo.